ABŞ-ın Hörmüz boğazı bölgəsinə göndərdiyi 31-ci Ekspedisiya Dəniz Piyada Bölməsi tapşırığını başa vuraraq Yaponiyanın Okinava adasındakı daimi dislokasiya məntəqəsinə qayıdıb.
AZPOST xəbər verir ki, bu barədə Kyodo agentliyi ABŞ hərbi komandanlığına istinadən məlumat yayıb.
Məlumata görə, bölmə desant-hücum gəmisi USS Tripoli ilə ABŞ Hərbi Dəniz Qüvvələrinin Okinavanın Uruma şəhərində yerləşən White Beach bazasına çatıb.
Bildirilir ki, 31-ci Ekspedisiya Dəniz Piyada Bölməsinin hərbçiləri Hörmüz boğazı ətrafında İran limanlarının blokadası əməliyyatında iştirak ediblər. Onlar bölgədə hərəkət edən bəzi gəmilərə baxış keçirmək üçün desant əməliyyatları da həyata keçiriblər.
USS Tripoli gəmisində ümumilikdə 3,5 minə yaxın dəniz piyadası və hərbi dənizçi olub. Daha əvvəl bu qüvvələrin zərurət yaranacağı təqdirdə, beşinci nəsil F-35B qırıcılarının dəstəyi ilə Hörmüz boğazındakı strateji əhəmiyyətli İran adalarından birinə mümkün desant əməliyyatında iştirak edə biləcəyi bildirilirdi.
Məlumata görə, USS Tripoli gəmisinin bundan sonra Yaponiyanın Kyuşu adasında yerləşən ABŞ Hərbi Dəniz Qüvvələrinin Sasebo bazasına qayıtması gözlənilir.
Bununla yanaşı, ABŞ-ın İran yaxınlığında hərbi mövcudluğunu davam etdirdiyi vurğulanır. Hazırda bölgədə iki zərbə aviadaşıyıcı qrupu da daxil olmaqla geniş ABŞ hərbi kontingenti yerləşdirilib.
