ABŞ-da ilk dəfə olaraq “süni ət”in -heyvan hüceyrələrindən hazırlanmış toyuq ətinin satışı təsdiqlənib.
Azpost.info bildirir ki, bu barədə Associated Press məlumat yayıb.
Upside Foods və Good Meat şirkətinə bununla bağlı icazə verilib. Onlar ABŞ-da kəsilməmiş əti – laboratoriyada yetişdirilmiş əti satan ilk şirkət olub. ABŞ Qida və Sanitar Nəzarət üzrə İdarəsi hər iki şirkətin məhsullarının istehlak üçün təhlükəsiz olduğunu qəbul edib.
Əti almaq üçün istənilən heyvandan kök hüceyrə nümunələri götürülür. Onlar böyümə faktorları, vitaminlər, minerallar və digər qida maddələrini ehtiva edən “bulyon” çəni olan bioreaktorda yerləşdirilir.
Burada oksigenlə təmin edilən kök hüceyrələr aktiv şəkildə çoxalır. Proses təxminən üç həftə çəkir. Hüceyrələrin kritik kütləsi yığıldıqda, əzələ lifləri yaratmaq üçün birləşirlər.
Hazır toyuq məhsulunun rəngi marektdə satılan natural ətdən bir qədər solğun olur. Bundan başqa quş ətindən heç nə ilə fərqlənmir.
“Süni ət” 20 dollara satılacaq. Şirkətlər yeni yeməkləri ilk olaraq eksklüziv restoranlara təqdim etməyi planlaşdırırlar.
