ABŞ Dövlət katibinin birinci müavini Lavrovla Belarusdakı vəziyyəti müzakirə edəcək

24 Avqust 2020 - 17:43

ABŞ Dövlət katibinin birinci müavini Stiven Biqanın Rusiyanın Xarici İşlər naziri Sergey Lavrovla müzakirə edəcəyi məsələlər açıqlanıb.

TASS-ın verdiyi xəbərə görə, bu barədə ABŞ-ın Rusiyadakı səfiri Con Sullivan jurnalistlərə açıqlamasında bildirib.

“Stiven Biqan Rusiya rəsmiləri ilə görüşmək üçün sabah Moskvaya gələcək. Avqustun 25-26-da o, Xarici İşlər naziri Sergey Lavrov, nazir müavinləri Sergey Ryabkov və İqor Morqulovla görüşəcək. Görüşlərdə S. Biqan ABŞ-ı narahat edən mövzuları, o cümlədən Belarusdakı hadisələri, KXDR-dəki vəziyyət, silahlara nəzarət, regional məsələləri müzakirə edəcək”, Con Sullivan deyib.

Səfir bildirib ki, Stiven Biqan Rusiya həbsxanalarında olan ABŞ vətəndaşları ilə bağlı məsələyə toxunacaq. “Bu Paul Villan, Trevor Rid, Maykl Kalvey ilə bağlıdır”, – deyə səfir Con Sullivan bildirib.