Ukrayna prezidenti Vladimir Zelenski ABŞ dövlət katibi Entoni Blinken və müdafiə naziri Lloyd Ostin ilə görüşüb.
Azpost.info xəbər verir ki, bu barədə Zelenskinin “Telegram” kanalında məlumat verilib. Zelenski bildirib ki, Ukrayna üçün bu mühüm məqamda ABŞ-ın yüksək vəzifəli rəsmilərindən ibarət nümayəndə heyətinin Kiyevə səfəri çox dəyərli və vacibdir.
Tərəflər müdafiə yardımı, Rusiyaya qarşı sanksiyalar siyasətinin gücləndirilməsi, həmçinin Ukraynaya maliyyə dəstəyi və təhlükəsizlik təminatlarını müzakirə ediblər. “ABŞ-ın 3,4 milyard dollarlıq müdafiə dəstəyi Ukraynanın müdafiə qabiliyyətinin gücləndirilməsinə ən böyük töhfədir. Bu yardım artıq Ukraynanın müdafiə qabiliyyətini keyfiyyətcə yeni səviyyəyə qaldırmağa kömək edir” – Zelenski deyib.
Onun sözlərinə görə, görüş zamanı bundan sonra da intensivləşməli və təcavüzkara əhəmiyyətli təsir elementinə çevrilməli olan sanksiyalar siyasətinə xüsusi diqqət yetirilib: “Biz bu yolda növbəti addımların nədən ibarət olduğunu başa düşürük və tərəfdaşların dəstəyinə ümid edirik”.
Görüşün sonunda Zelenski Yermak-Makfol beynəlxalq təşkilatı tərəfindən hazırlanmış Rusiyaya qarşı sanksiyaların gücləndirilməsi üzrə Fəaliyyət Planını ABŞ tərəfinə təhvil verib. O həmçinin bildirib ki, ABŞ-ı Ukraynanın təhlükəsizliyinin qarantı olacaq ölkələr arasında lider kimi görür.
Azpost.info
