ABŞ dövlət katibi Marko Rubio Türkiyə xarici işlər naziri Hakan Fidan və Ermənistan baş naziri Nikol Paşinyan ilə Cənubi Qafqazda sülh prosesini müzakirə edib.
AzPost bildirir ki, ABŞ Dövlət Departamenti martın 25-də dövlət katibi M.Rubio və onun türkiyəli həmkarı H.Fidan arasında Vaşinqtonda görüş keçirildiyi barədə məlumat yayıb.
Dövlət Departamentinin sözçüsü Temmi Brüs bildirib ki, görüşdə tərəflər təhlükəsizlik və ticarət sahəsində əməkdaşlığı müzakirə edib: “Dövlət katibi Türkiyədən Ukrayna və Cənubi Qafqazda sülhün bərqərar olmasına dəstək istəyib”.
Eyni gündə Departament M.Rubio və Ermənistan baş naziri N.Paşinyan arasında telefon danışığı barədə məlumat yayıb. Dövlət katibi Azərbaycan və Ermənistan arasında sülh sazişinin mətninin razılaşdırılmasını təqdir edib.
“Dövlət katibi Cənubi Qafqazda təhlükəsizlik və rifahı təmin etmək üçün davamlı sülhün vacibliyini vurğulayıb.”, – ABŞ Dövlət Departamentinin sözçüsü qeyd edib.
İrəvanla Bakı martın 13-də sülh sazişi mətni ilə bağlı danışıqlar prosesinin yekunlaşması barədə açıqlama veriblər.
