İranın sonuncu şahının oğlu Rza Pəhləvi “Azadlıq” mükafatına layiq görülüb. Mükafatın əslində “İran xalqı”na verildiyi bildirilir.
Bu barədə AFP məlumat yayıb.
Mükafatın təqdimetmə mərasimi şənbə günü Frankfurt-Maynda keçirilib. Tədbir Pəhləviyə mükafat verilməsi qərarına qarşı etiraz aksiyaları ilə müşayiət olunub.
Mükafatı Almaniyanın Azad Demokratik Partiyasına (FDP) yaxınlığı ilə tanınan Fridrix Nauman Fondu təqdim edib.
Müqəddəs Pavel kilsəsində keçirilən mərasimdə çıxış edən Pəhləvi bildirib ki, iranlıların demokratiya dərslərinə ehtiyacı yoxdur, lakin onlar öz demokratik hüquqlarını həyata keçirmək imkanından məhrumdurlar. Onun çıxışı alqışlarla qarşılanıb.
Siyasətçinin minlərlə tərəfdarı binanın qarşısına toplaşıb. Onların çoxu İranda monarxiya dövründə istifadə olunan bayraqları dalğalandırıb.
Bununla belə, mükafatın təqdim edilməsi qərarı tənqidlərə səbəb olub. Almaniya Sosial-Demokrat Partiyasının və “Yaşıllar” partiyasının yerli bölmələri tədbiri boykot edərək Pəhləvinin İran xalqının qanuni nümayəndəsi hesab edilə bilməyəcəyini bildiriblər.
Onun atası Məhəmməd Rza Pəhləvi 1979-cu il inqilabı nəticəsində hakimiyyətdən devrilib. Həmin inqilabdan sonra İranda islam ruhanilərinin hakimiyyəti qurulub.
Rza Pəhləvinin tənqidçiləri onun İsraili dəstəkləməsinə və atasının avtoritar hakimiyyətindən kifayət qədər uzaqlaşmamasına da diqqət çəkirlər.
Pəhləvinin özü isə bildirib ki, mükafatı yalnız müvəqqəti olaraq qəbul edir. O, bunu İranda demokratik yolla seçilmiş hökumət formalaşana qədər saxlayacağını deyib.
Onun sözlərinə görə, bir gün mükafatı Tehranda onun “qanuni sahiblərinə” təhvil vermək niyyətindədir.
