Rusiya hava sərhədi yaxınlığında görünən Amerika bombardmançı təyyarələrinə qarşı MİQ-31 qırıcları səmaya qaldırılıb.
Azpost.info bildirir ki, bu barədə Rusiya Müdafiə Nazirliyi məlumat yayıb.
Məlumatda deyilir ki, martın 24-də Rusiyanın Barents dənizi üzərində hava məkanına nəzarət sistemləri Rusiya dövlət sərhədinə yaxınlaşan qrup halında hava hədəfi aşkarlayıb. Hava hədəfinin müəyyən edilməsi və Rusiyanın dövlət sərhədinin pozulmasının qarşısının alınması üçün hava hücumundan müdafiə qüvvələrinin növbətçi MiQ-31 qırıcısı havaya qalxıb.
“Rusiya qırıcısının ekipajı hava hədəfinin ABŞ Hərbi Hava Qüvvələrinə məxsus bir cüt B-1B strateji bombardmançı təyyarəsi olduğunu müəyyən edib. Rusiya qırıcısı yaxınlaşdıqca, Amerika strateji bombardmançıları uçuş istiqamətlərini tənzimləyərək uzaqlaşıb və Rusiyanın dövlət sərhədindən geri dönüblər”.
Rusiya dövlət sərhədinin pozulması halı qeydə alınmayıb.
“Rusiya qırıcısının uçuşu təhlükəsizlik tədbirlərinə riayət olunmaqla neytral sular üzərində hava məkanından istifadə üzrə beynəlxalq qaydalara ciddi riayət olunmaqla həyata keçirilib”, – məlumatda qeyd edilir.
