SSRİ-də çəkilmiş “Salam və əlvida” filmi sovet kinosunun Qızıl Fonduna daxil edilib.
AzPost bildirir ki, rejissor Vitali Melnikov tərəfindən 1972-ci ildə Lenfilm kinostudiyasında çəkilmiş sovet tammetrajlı rəngli film ailə dramasıdır.
Amma filmlə bağlı maraqlı məqam diqqət çəkir. 64-cü dəqiqədə bir paket Tide (Tayd) yuyucu toz görünür. Bu yuyucu toz yalnız SSRİ dağıldıqdan sonra keçmiş MDB məkanında satılırdı, geniş reklam olunurdu.
Qərblə iqtisadi-ticarət əlaqələrinin demək olar ki, mövcud olmadığı, “soyuq müharibə”nin qızğın çağında “Tayd” haradan filmə düşüb?
Bunun sadə izahı var: O zaman Tide İranda lisenziya əsasında istehsal olunurdu. İranın SSRİ ilə ticarət əməkdaşlığı var idi. Ona görə də Tide ölkəyə sürətlə nüfuz etmişdi. Üstəlik, bu toz SSRİ üçün rus dilində qablaşdırılırdı. Beləliklə, toz ən adi yuyucu vasitə kimi filmə düşüb.
1970-ci illərin sonunda isə SSRİ ilə İran arasında münasibətlər daha da pisləşdi və uzunmüddətli əməkdaşlıq dayandırıldı.
