ABŞ təkmilləşdirilmiş B61-12 taktiki bombalarının Avropada yerləşdirilməsini sürətləndirmək qərarına gəlib.
Azpost.info xəbər verir ki, bu barədə “Politico” yazıb.
Məqalədə qeyd olunur ki, onlar dekabr ayında qitədəki NATO bazasına nəzərdə tutulduğundan tez çatdırılmalıdır. İlk vaxtlar yerləşdirmənin gələn yaza qədər təxirə salınması planlaşdırılırdı.
Müəllif qeyd edir ki, qərar Şimali Atlantika Alyansının Brüsseldə keçirilən qapalı iclasında elan edilib.
“Rusiyanın nüvə ritorikasının artmasını nəzərə alaraq, müttəfiqlərin bir hissəsi daimi hazırlıq və mesajların ardıcıl ötürülməsini təmin etmək üçün NATO-da məsləhətləşmələri davam etdirməyi xahiş edib”, – “Politico” qeyd edir.
Məsələ ilə bağlı jurnalistlərə ABŞ Müdafiə Nazirliyinin sözçüsü Patrik Rayder də danışıb. O bildirib ki, Vaşinqton nüvə arsenalı məsələsini ətraflı müzakirə etmək niyyətində deyil. Onun sözlərinə görə, B61 proqramı üzrə modernləşdirmə uzun illərdir ki, davam edir. Köhnə silahlar daha müasir silahlarla əvəz olunur.
Rayder əlavə edib ki, modernləşmənin Ukraynadakı cari hadisələrlə heç bir əlaqəsi yoxdur.
Azpost.info
