“ABŞ Ukraynadan taxıl ixracının bərpası müqabilində Rusiyaya qoyulan məhdudiyyətləri yumşaltmayacaq”.
Azpost.info xəbər verir ki, bunu “Politico”ya ABŞ administrasiyasındakı mənbə bildirib.
Nəşrin yazdığına görə, Vaşinqton Rusiya, Türkiyə və BMT arasında Ukrayna taxılına dair danışıqların gedişatını diqqətlə izləyir. BMT-dəki mənbə isə “Politico”ya deyib ki, taxıl ixracının sanksiyaların ləğvi ilə əlaqələndirilməsi onsuz da kövrək olan danışıqlar prosesini çətinləşdirir.
Nəşrə görə, Rusiya rəhbərliyi bir tərəfdən Ukraynadakı limanların blokadadan çıxarılmasını sanksiyaların ləğvinə bağlayır. Digər tərəfdən də Rusiyanın Ukraynadan taxıl ixracına mane olmadığını, sadəcə minalara görə orada naviqasiyanın qeyri-mümkün olduğunu deyir. Rusiya hökuməti dəfələrlə ərzaq böhranını anti-Rusiya sanksiyaları ilə əlaqələndirib.
Prezident Vladimir Putin ərzaq təminatında yaranan çətinliklərin Qərb ölkələrinin yanlış iqtisadi və maliyyə siyasətinin, eləcə də onların Rusiyaya tətbiq etdiyi sanksiyalarının nəticəsi olduğunu bildirib. Putin Ukraynadan taxılın çıxarılmasının ən asan və ucuz yolunun Belarusdan keçdiyinə diqqət çəkib. Lakin qeyd edib ki, bunun üçün sanksiyaları ləğv etmək lazımdır.
Azpost.info
