Azərbaycanda fəaliyyət göstərən banklardan biri olan AccessBank-ın debet kartları ilə bağlı tətbiq etdiyi məhdudiyyət müştərilər arasında ciddi narazılıq doğurub.
AzPost xəbər verir ki, sosial şəbəkələrdə və şikayət platformalarında yayılan müraciətlərdə bildirilir ki, bankın debet kartı vasitəsilə gün ərzində ümumilikdə 20 manata yaxın mədaxil əməliyyatı aparıldıqdan sonra kartın mədaxil funksiyası avtomatik bloklanır.
Müştərilərin sözlərinə görə, söhbət ayrı-ayrı əməliyyatlardan deyil, müxtəlif mənbələrdən daxil olan ümumi məbləğdən gedir. Nəticədə kart sahibi əlavə izahat verənədək və ya bankla əlaqə saxlayıb araşdırma aparılanadək kartdan normal şəkildə istifadə edə bilmir. Bu hal xüsusilə fərdi sahibkarlar, frilanserlər və dövriyyəsi yüksək olan fiziki şəxslər üçün ciddi çətinliklər yaradır.
Narazılıq yaradan əsas məqam isə ondan ibarətdir ki, digər banklarda fiziki şəxslər gün ərzində daha yüksək məbləğlərdə, hətta beşrəqəmli və daha çox əməliyyatlar aparsalar belə, oxşar avtomatik bloklama mexanizmi tətbiq edilmir. Bu isə AccessBank-ın yanaşmasının selektiv və qeyri-şəffaf olması ilə bağlı suallar doğurur.
Hüquqşünasların fikrincə, banklar “Cinayət yolu ilə əldə edilmiş pul vəsaitlərinin və digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanuna əsasən şübhəli əməliyyatları izləmək və müvəqqəti məhdudiyyətlər tətbiq etmək hüququna malikdirlər. Lakin bu məhdudiyyətlər risk əsaslı yanaşmaya söykənməli, konkret şübhə indikatorları ilə əsaslandırılmalı və müştəriyə aydın şəkildə izah edilməlidir.
Ekspertlər vurğulayır ki, təkcə məbləğin həcminə görə avtomatik bloklama tətbiqi hüquqi baxımdan mübahisəlidir. Çünki fiziki şəxsin gəlir mənbəyi rəsmi və şəffaf ola bilər. Üstəlik, bank daxili qaydalarının müştəriyə əvvəlcədən açıq formada bildirilməməsi “İstehlakçıların hüquqlarının müdafiəsi haqqında” qanunun prinsiplərinə də zidd hesab oluna bilər.
Maliyyə məsələləri üzrə mütəxəssislər hesab edirlər ki, banklar risk idarəetməsi ilə müştəri rahatlığı arasında balansı qorumalıdır. Əks halda bu cür məhdudiyyətlər bank sektoruna inamı zəiflədir və müştərilərin digər maliyyə institutlarına yönəlməsinə səbəb olur.
Məsələ ilə bağlı AccessBank tərəfindən rəsmi açıqlama verilməsə də, mütəxəssislər müştərilərə tövsiyə edirlər ki, kart bloklanması ilə üzləşdikdə bankdan yazılı izahat tələb etsinlər, zərurət yaranarsa Mərkəzi Banka və ya maliyyə ombudsmanına müraciət etsinlər.
