AFB Bank
Azərbaycanda fəaliyyət göstərən “AFB Bank” ASC-də işçilərlə rəhbərlik arasındakı maaş fərqi daha da böyüyüb. AzPost xəbər verir ki, bankın 2024-cü il maliyyə hesabatında yer alıb.
Belə ki, işçilərə ödəniləcək vəsait 642 min manata düşüb. Halbuki bu məbləğ ötən il 1 milyon 361 min manat olub. Yəni 2 dəfədən çox azalma baş verib. Sosial müdafiə fonduna (DSMF) edilən ödənişlərdə də ciddi azalma müşahidə olunub — 219 mindən 110 min manata.
Ən maraqlısı isə rəhbərliyə ayrılan pullardadır. Bankın Müşahidə Şurası və İdarə Heyətinin üzvlərinə ödənilən qısamüddətli müavinətlər 700 min manatdan 1 milyon 4 min manata yüksəlib. Artım faizi 43% təşkil edir.
Əlavə edək ki, AFB Bank aktivlərinə görə ölkədə fəaliyyət göstərən 22 bank arasında 20-ci sırada qərarlaşıb.
Maraqlıdır ki, bank işçilərinin maaşlarını kəskin azaltsa da, rəhbər şəxslərin mükafatlarını artırmağa üstünlük verib. Məsələ ilə bağlı bankdan hələlik rəsmi açıqlama verilməyib.
