Qərb rəsmiləri Rusiyaya sanksiyalardan yayınmağa kömək edən ölkələrə təzyiqləri artırmağa davam edir.
Azpost.info xəbər verir ki, Rusiya ilə işləyən şirkət və banklara qarşı sanksiyalarla hədələdiyi Qazaxıstanın ardınca ABŞ Özbəkistan hakimiyyətinə də xəbərdarlıq edib.
Avropa İttifaqının xüsusi nümayəndəsi David Osallivan Daşkəndə səfərindən sonra bildirib ki, qeyri-qanuni əməliyyatlar aşkar olunarsa, Özbəkistanın iqtisadi qurumları sanksiyalara məruz qalacaq.
O, Özbəkistan rəsmilərinə ikili təyinatlı malların siyahısını təhvil verdiyini deyib. Bunlar, xüsusən Avropa istehsalı olan blok-sxemlər, mikroçiplər və optik avadanlıqlardır.
“Biz bu siyahıdan malların Özbəkistan ərazisindən ixracında 126 faiz artım müşahidə etdik ki, bu da kifayət qədər ciddi rəqəmdir”, -Aİ nümayəndəsi bildirib.
Onun sözlərinə görə, son aylarda Aİ Gömrük Komitəsi və Özbəkistan Mərkəzi Bankı ilə səmərəli məlumat mübadiləsi aparıb və respublika ərazisindən sanksiyalardan yayınmaq üçün istifadə olunmayacağına dair təminat alıb.
“Euromonitor International”ın məlumatına görə, ötən il Aİ-dən Rusiya ilə həmsərhəd ölkələrə sanksiya tətbiq olunan malların tədarükü təxminən iki dəfə artıb. Onların Rusiyaya birbaşa ixracı isə 71 faiz azalıb.
Rusiya hökuməti əvvəllər qaçaqmal sayılan paralel idxalın həcmini 20 milyard dollar dəyərində qiymətləndirib. Mərkəzi Bankın statistikasına görə, xaricdən Rusiyaya malların tədarükü ötən il cəmi 8 faiz azalaraq 280 milyard dollar olub.
Azpost.info
