“Minsk razılaşmalarını imzalayan Fransanın keçmiş prezidenti Fransua Olland və Almaniyanın keçmiş kansleri Angela Merkel onlara əməl etmək niyyətində deyildi”.
Azpost.info xəbər verir ki, bunu Rusiya Dumasının spikeri Vyaçeslav Volodin öz “Teleqram” kanalında bildirib.
Onun sözlərinə görə, sənəddən Kiyev rejimini hərbiləşdirmək və hərbi əməliyyatlara hazırlamaq üçün istifadə edilib.
“Ukraynada baş verənlərə görə Avropa dövlətləri hesab verməli olacaq. İlk növbədə də Almaniya və Fransa”, – Volodin yazıb.
Duma sədri deyir ki, Almaniya hökuməti öz sələflərinin yaratdığı problemləri Rusiyaya keçirmək qərarına gəlib: “Bu məqsədlə Ukraynanı bərpa etmək üçün Rusiya aktivlərini geri çəkməyi planlaşdırırlar. Belə bir qərar qəbul edilən kimi Moskvanın Almaniya və digər dövlətlərin aktivlərinə münasibətdə oxşar addımlar atmaq hüququ var”.
Bir neçə gün əvvəl açıqlama verən Olland bildirib ki, Merkel 2014-cü ildə Minsk razılaşmalarının bağlanmasını Kiyevə güclənmək üçün vaxt vermək cəhdi adlandırarkən haqlı olub. Onun sözlərinə görə, 2014-cü ildən sonrakı geosiyasi vəziyyət Ukrayna üçün əlverişli deyildi və Qərbin nəfəs almağa ehtiyacı var idi.
Azpost.info
