Almaniyanın Aşaффenburq şəhərində 9 ay əvvəl azyaşlılara qarşı baş vermiş dəhşətli hücumun təfərrüatları məhkəmədə açıqlanıb.
AzPost bildirir ki, psixi xəstə olduğu müəyyən edilən 28 yaşlı Əfqanıstan vətəndaşı Emalulla O. iki nəfərin ölümü, bir neçə nəfərin isə yaralanması ilə nəticələnən hücumda günahkar bilinib.
Hadisə bu ilin yanvar ayında baş verib. Uşaq bağçasının beş nəfərdən ibarət qrupu iki tərbiyəçi ilə birlikdə parkda gəzərkən, kişi mətbəx bıçağı ilə onlara hücum edib. Nəticədə iki yaşlı oğlan uşağı və onu qorumağa çalışan 41 yaşlı kişi həlak olub. Daha üç nəfər, o cümlədən iki yaşlı suriyalı qız və 72 yaşlı kişi müxtəlif dərəcəli bıçaq xəsarətləri alıblar.
Prokuror Yürqen Bunçux bildirib ki, təqsirləndirilən şəxs paranoidal şizofreniyadan əziyyət çəkir və hücum zamanı halüsinasiyalar görüb. O, hadisədən əvvəl YouTube-da “Motivasiyaedici döyüş musiqisi” adlı video izləyib. Məhkəmə prosesi zamanı Emalulla O. sakit, halsız vəziyyətdə olub və dediyinə görə, qəbul etdiyi dərmanlar səbəbindən özünü zəif hiss edib.
Prokurorluq onun daimi olaraq psixiatrik klinikaya yerləşdirilməsini tələb edir. Məhkəmə araşdırması zamanı məlum olub ki, 2023-cü ildə Almaniya hakimiyyəti Emalulla O.-nu Bolqarıstana deportasiya etməyə cəhd edib, lakin bu baş tutmayıb.
Hücum Almaniyada miqrasiya siyasəti ətrafında kəskin müzakirələrə səbəb olub. Xristian-demokratların lideri Fridrix Mers hadisədən sonra sərhəd nəzarətinin gücləndirilməsi və sığınacaq qaydalarının sərtləşdirilməsi çağırışı ilə çıxış edib. O, sonradan “Almaniya üçün Alternativ” (AfD) partiyasının dəstəyi ilə immiqrasiya siyasətinin sərtləşdirilməsini tələb edən qətnaməni parlamentdən keçirməyə nail olub.
