Azərbaycan Milli Elmlər Akademiyası (AMEA) sosial şəbəkələrdə qurumun prezidenti İsa Həbibbəylinin Ramiz Mehdiyevin vəzifə verəcəyi şəxslər sırasında adının çəkilməsinə münasibət bildirib.
Azpost.info bildirir ki, AMEA-nın İctimaiyyətlə əlaqələr şöbəsinin yaydığı açıqlamada bu məlumatın Akademiya rəhbərliyinə qarşı növbəti təxribat olduğu qeyd edilib.
Bildirilib ki, Ramiz Mehdiyev AMEA-ya rəhbərlik etdiyi dövrdə İsa Həbibbəylinin vəzifəsinin aşağı salınması və səlahiyyətlərinin məhdudlaşdırılması ilə bağlı bir sıra rəsmi qərarlar qəbul olunub.
Açıqlamada qeyd edilir ki, AMEA Rəyasət Heyətinin Ramiz Mehdiyev tərəfindən imzalanmış 8 yanvar 2021-ci il tarixli, 1/15 saylı qərarı ilə İsa Həbibbəyli birinci vitse-prezident vəzifəsindən azad edilib və vitse-prezident vəzifəsini icra edən şəxs təyin olunub.
Bundan başqa, Ramiz Mehdiyevin sədrliyi ilə keçirilən AMEA Rəyasət Heyətinin 26 yanvar 2022-ci il tarixli iclasında İsa Həbibbəylinin 2013-cü ildən rəhbərlik etdiyi Humanitar və İctimai Elmlər Bölməsinin iki yerə ayrılması barədə qərar qəbul edilib. Nəticədə İctimai Elmlər Bölməsi onun rəhbərlik etdiyi strukturdan ayrılıb və vəzifə səlahiyyətləri azaldılıb.
AMEA-nın məlumatına görə, bundan bir neçə gün sonra – 7 fevral 2022-ci ildə İsa Həbibbəyli Humanitar Elmlər Bölməsi üzrə vitse-prezident vəzifəsindən azad olunması ilə bağlı Akademiyanın rəhbərinə ərizə ilə müraciət edib.
Açıqlamada vurğulanıb ki, həmin dövrdə Ramiz Mehdiyevlə İsa Həbibbəyli arasında münasibətlərin xarakteri nəzərə alınarsa, sonuncunun Mehdiyevin vəzifə verəcəyi şəxslər sırasında göstərilməsi həqiqəti əks etdirmir.
AMEA hesab edir ki, bu məlumat hazırkı vəziyyətdən istifadə etməklə Akademiyanın prezidentinə qarşı yeni qarayaxma kampaniyası aparmağa xidmət edir.
