Sosial müdafiə
Füzuli rayonunun 32 nömrəli orta məktəbində Biologiya müəllimi işləyən Qibiyeva Aygün Rahil qızı analıq məzuniyyəti ilə bağlı ciddi problemin yaşandığını bildirib.
AzPost xəbər verir ki, müəllim bu barədə sosial şəbəkələrdə şikayət məktubu ünvanlayıb.
Onun sözlərinə görə, may ayının 1-dən etibarən 119 günlük analıq məzuniyyətinə çıxsa da, bu müddət ərzində ona qanunla nəzərdə tutulan məzuniyyət ödənişi verilməyib.
Problem isə Səhiyyə Nazirliyi və Dövlət Sosial Müdafiə Fondu (DSMF) arasında sənəd uyğunsuzluğu ilə bağlıdır. Belə ki, müəllimənin təqdim etdiyi sənəd Səhiyyə Nazirliyi tərəfindən verilsə də, DSMF həmin sənədi qəbul etmir. Hər iki qurum məsuliyyəti bir-birinin üzərinə atır.
“Hər gün zəng vururam. Səhiyyə Nazirliyi deyir ki, DSMF düzəltməlidir, DSMF isə bildirir ki, sənəddəki problem Nazirlik tərəfindən aradan qaldırılmalıdır. Artıq psixologiyam pozulub, danışmaqdan yorulmuşam. Sadə bir düzəlişin bu qədər çətin olması inanılmazdır”, – deyə müəllim bildirib.
Aygün Qibiyeva qeyd edir ki, artıq analıq məzuniyyətinin üçüncü ayı daxil olub, lakin bir qəpik belə ödəniş edilməyib. Müəllim bu prosesi “bir anaya, bir müəllimə qarşı haqsızlıq” kimi dəyərləndirir.
“Bu mənim son müraciətimdir. Əgər tezliklə məsələyə baxılmasa, birbaşa ölkə rəhbərliyinə – Prezidentə və Vitse-Prezidentə müraciət edəcəyəm”, – deyə şikayətçi əlavə edib.
DSMF-dən AzPost-a verilən rəsmi açıqlamada bildirilib ki, 1 may 2025-ci il tarixindən ölkə üzrə xəstəlik vərəqələrinin elektron sənəd formasında tərtib olunması tətbiq edilir.
Tibb müəssisələrində elektron xəstəlik vərəqələrinin tərtibatında yol verilən səhvlərin aradan qaldırılması məqsədilə elektron xəstəlik vərəqələrində düzəlişlərin edilməsi Dövlət Sosial Müdafiə Fondunun fəaliyyət istiqamətinə aid deyil.
Aidiyyəti qurum tərəfindən bu prosedurlar tənzimlənir.
