Müasir smartfonlarda şəxsi məlumatların, bank hesablarının, parolların və digər vacib informasiyaların saxlanılması cihazın təhlükəsizliyini daha da önəmli edib. Google Android əməliyyat sistemi üçün telefonun oğurlandığı anı müəyyən edə və cihazı avtomatik bloklaya bilən xüsusi “Oğurluqdan qorunma” (Theft Protection) funksiyalarını təqdim edib.
Azpost.info xəbər verir ki, bu barədə Engadget yazıb.
Google Play xidmətlərinin yenilənməsi sayəsində Android smartfonları qeyri-adi hərəkətləri müəyyən edə və cihazın sahibinin əlindən zorla alınması ehtimalına reaksiya verə bilir.
Telefon oğurlananda avtomatik bloklana bilər
Sistemin ən vacib funksiyalarından biri Theft Detection Lock – oğurluğun aşkar edilməsi zamanı avtomatik bloklamadır.
Bu funksiya smartfonun daxili sensorlarından və süni intellekt alqoritmlərindən istifadə edir. Əgər kimsə telefonu sahibinin əlindən qəfil götürüb qaçarsa, sistem həmin hərəkətin xarakterini müəyyən edərək ekranı avtomatik bloklaya bilər.
İnternet kəsiləndə də qorunma davam edir
Digər mühüm funksiya Offline Device Lock adlanır.
Oğru telefonu tapmağı çətinləşdirmək üçün SIM kartı çıxara, interneti söndürə və ya cihazı uçuş rejiminə keçirə bilər. Bu halda smartfon şəbəkə əlaqəsinin itirildiyini qeydə alaraq avtomatik bloklana bilər.
Beləliklə, cihazın təhlükəsizliyi yalnız internet bağlantısından asılı olmur.
Oğurlanan telefonu uzaqdan bloklamaq mümkündür
Remote Lock funksiyası isə itirilmiş və ya oğurlanmış smartfonu uzaqdan bloklamağa imkan verir.
İstifadəçi başqa bir cihaz vasitəsilə Android-in Remote Lock xidməti səhifəsinə daxil olaraq telefon nömrəsini yazır və ekrandakı təlimatları izləyir.
Bu üsul telefona fiziki çıxış imkanı olmadıqda cihazdakı şəxsi məlumatların qorunmasına kömək edə bilər.
Bu funksiyalar necə aktiv edilir?
Oğurluqdan qorunma funksiyaları Google Play xidmətlərinə inteqrasiya olunub və əksər Android 10 və daha yeni versiyalı smartfonlarda mövcuddur.
Menyu yolu istehsalçıdan asılı olaraq fərqlənə bilər.
Samsung Galaxy smartfonlarında:
Parametrlər → Təhlükəsizlik və məxfilik → İtirilmiş cihazların qorunması → Oğurluqdan qorunma
Google Pixel və digər Android telefonlarında:
Parametrlər → Təhlükəsizlik və məxfilik → Cihazın kilidinin açılması → Oğurluqdan qorunma
PIN kodu və biometrik qorunma vacibdir
Mütəxəssislər bildirirlər ki, bu funksiyalar əsas təhlükəsizlik tədbirlərini əvəz etmir.
Telefon üçün mürəkkəb PIN kodu və ya güclü parol seçmək, həmçinin barmaq izi və üz tanıma funksiyalarını aktiv etmək tövsiyə olunur.
Bundan başqa, Identity Check funksiyası da əlavə qorunma təmin edə bilər. Bu sistem istifadəçi ev və ya iş yeri kimi tanış məkanlardan kənarda təhlükəsizlik parametrlərini dəyişmək istədikdə əlavə biometrik təsdiq tələb edir.
N.Talıblı
