Sağlam və düzgün seçilmiş axşam yeməyi yalnız arıqlamağa deyil, həm də yuxunun və ümumi əhvalın yaxşılaşmasına kömək edə bilər.
Dietoloqlar Laura Burak və Loren Manaker hesab edirlər ki, axşam yeməyi çəki azaltmaq prosesində mühüm rol oynayır. Axşam saatlarında həddindən artıq ağır və kalorili qidalar qəbul etmək arıqlamağı çətinləşdirə bilər.
Mütəxəssislərin fikrincə, arıqlamaq istəyənlər axşam yeməyində bir neçə əsas qaydaya əməl etməlidir.
Axşam yeməyi yüngül olmalıdır
Yuxu vaxtı yaxınlaşdıqca qidalanma daha yüngül olmalıdır. Gün ərzində daha doyumlu qidalar qəbul etmək, axşam isə daha yüngül yeməklərə üstünlük vermək məsləhətdir.
Kalorilərə diqqət etmək lazımdır
Faydalı qidalar da həddindən artıq qəbul edildikdə çəki artımına səbəb ola bilər. Məsələn, avokado, qoz-fındıq və yağlı balıq faydalı yağlarla zəngindir, lakin kalorisi yüksək olduğundan onları normada yemək lazımdır.
Axşam tərəvəzlərə üstünlük verin
Axşam menyusunun əsasını nişastasız tərəvəzlər təşkil edə bilər. Bu məhsullar liflə zəngin, kaloriləri isə nisbətən azdır.
Dietoloqlar gül kələmi, brokoli, Brüssel kələmi, pırasa, çuğundur və yaşıl lobyaya üstünlük verməyi tövsiyə edirlər.
Zülallı qidalar tox saxlayır
Axşam yeməyinə zülalla zəngin məhsullar əlavə etmək uzun müddət tox qalmağa kömək edə bilər.
Yumurta, yağsız mal əti, quş əti və göbələk uyğun seçimlər arasında göstərilir.
Qızartmadan imtina edin
Yeməyin hazırlanma üsulu da vacibdir. Dietoloqlar məhsulları sobada bişirməyi, qaynatmağı və ya qrildə hazırlamağı daha uyğun hesab edirlər.
Qızardılmış və yağlı qidaların isə arıqlama prosesinə mane ola biləcəyi bildirilir.
Faydalı karbohidratları da unutmayın
Balanslı axşam yeməyində az miqdarda mürəkkəb karbohidratlara yer vermək mümkündür. Kinoa, mərcimək, qarğıdalı və lobya belə məhsullara nümunədir.
Bu qidalar orqanizmi enerji ilə təmin edir və axşam saatlarında qəlyanaltı istəyinin qarşısını almağa kömək edə bilər.
Mütəxəssislər bildirirlər ki, düzgün seçilmiş və ölçülü axşam yeməyi çəkiyə nəzarətlə yanaşı, insanın ümumi özünü yaxşı hiss etməsinə də kömək edə bilər.
