Rusiyanın bir sıra regionlarının rəhbərləri, həmçinin hərbi müxbirlərinin adı Avropa Birliyinin 11-ci sanksiyalar paketinə salınıb.
Azpost info bildirir ki, sənəd Aİ-nin Rəsmi Jurnalında dərc edilib və qüvvəyə minib.
Avropa İttifaqı Rusiya ərazisindən onun hərbi-texnoloji və ya enerji sektorunun inkişafına töhfə verə biləcək mal və texnologiyaların tranzitini qadağan edib. Aİ həmçinin Rusiyaya əqli mülkiyyət hüquqlarının satışını, bu cür mal və texnologiyalara çıxış imkanı verlməsini qadağan edib.
Ümumilikdə 71 fiziki və 33 hüquqi şəxs Aİ-nin sanksiyalarına məruz qalıb. Onların arasında Voronej vilayətinin qubernatoru Aleksandr Qusev, Stavropol diyarının rəhbəri Vladimir Vladimirov, Krasnodar diyarının qubernatoru Veniamin Kondratyev, Maqadan vilayətinin qubernatoru Sergey Nosov, Kamçatka diyarının qubernatoru Vladimir Solodov və Adıgey Respublikasının rəhbəri Murat Kumpilov da var.
ABŞ-da Rusiyaya qarşı sanksiyalardan yayınmaqda ittiham olunan Krasnoyarsk diyarının keçmiş qubernatoru Aleksandr Ussun oğlu, iş adamı Artem Uss da məhdudiyyətlər altına düşüb.
Sanksiya siyahısına həmçinin hərbi jurnalistlər – Yevgeni Poddubnı, Semyon Peqov, Aleksandr Sladkov, Moskva Şəhər Dumasının deputatı və hərbi komissarı Andrey Medvedev, politoloq Sergey Karaqanov, biznesmen Artem Çayka və onun qardaşı İqor Çayka, Dövlət Nəqliyyat Lizinq Şirkətinin baş direktoru Yevgeni Ditrix daxil edilib.
Bundan əlavə, Rusiya müdafiə nazirinin müavini Tatyana Şevtsova, bir neçə rus hakimi və yüksək rütbəli hərbçilərə, o cümlədən general-polkovnik Aleksandr Lapinə qarşı məhdudiyyətlər tətbiq edilib.
