“Avropa İttifaqının strateji və həyati əhəmiyyətli qərarlar qəbul edərkən yekdillik prinsipindən imtina etməsinin vaxtıdır. Qərar qəbuletmə prosesində islahatların aparılması üçün səy göstərməliyik”.
Azpost.info xəbər verir ki, bunu Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Jozep Borrel deyib.
O xatırladıb ki, müxtəlif vaxtlarda Brüssel Aİ-nin xarici siyasətində yekdillik prinsipinin acı nəticələri ilə üzləşib: “Bu prinsip müəyyən məqamlarda hərəkətlərimizi zəiflədib, ləngidib”.
Borrel Rusiyaya qarşı sanksiyaların tətbiqi zamanı patriarx Kirilin “qara siyahı”dan “itməsini” misal çəkib: “Mayın sonunda biz Rusiyaya qarşı altıncı sanksiyalar paketi ilə bağlı razılığa gəldik. Amma bu proses bir ay çəkdi. Təəssüf ki, bəzi yekun müddəalar yumşaldıldı, patriarx Kiril sanksiyaya məruz qalanlar siyahısından çıxarıldı”.
Onun sözlərinə görə, qərarın yekdilliklə və ya ixtisaslı səs çoxluğu ilə qəbul edilməsi arasındakı fərq böyük əhəmiyyət kəsb edir: “Əgər ölkələr əvvəlcədən yekun qərarın ixtisaslı səs çoxluğu ilə qəbul edilə biləcəyini bilsələr, danışıqlar aparmaq və konsensus yaratmaq üçün güclü stimula malik olarlar. Hər şeyə mane oluna bilinəcəyini görəndə sağlam bir kompromis əldə etməyə həvəsləri olmur”.
Azpost.info
