“Rusiyanın Ukraynadakı müharibəsinə görə Avropanın təhlükəsizliyi təhdid altındadır”.
Azpost.info xəbər verir ki, bunu Almaniyada səfərdə olan Böyük Britaniya kralı III Çarlz Bundestaqda çıxışı zamanı deyib.
“Müharibə bəlası yenidən Avropadadır, Ukraynaya qarşı təcavüzkar müharibə günahsız insanlara ağlasığmaz iztirablar gətirir. Avropanın təhlükəsizliyi, eləcə də demokratik dəyərlərimiz təhdid altındadır”, – Çarlz vurğulayıb.
Britaniya kralı dünyanın baş verənlərə laqeyd qalmadığını, həmrəy olduğunu da bildirib və Ukraynaya hərbi dəstəyə görə Almaniyaya təşəkkür edib.
III Çarlz Bundestaqda ingilis və alman dillərində danışıb. AFP yazır ki, kral etiketinə görə, ev sahibinin dilində danışmaq böyük hörmət əlaməti sayılır.
Deputatlar qarşısında çıxış etməzdən əvvəl o, Almaniya prezidenti Frank-Valter Ştaynmayer və Almaniya kansleri Olaf Şoltsla görüşüb.
Kralın Almaniyaya dövlət səfəri cümə günü, martın 31-də başa çatacaq. Səfərdə onu xanımı Kamilla müşayiət edir.
Azpost.info
