“Axmat” çeçen xüsusi təyinatlıları Baxmut istiqamətinə köçürülüb.
Azpost.info xəbər verir ki, bu barədə Çeçenistan lideri Ramzan Kadırov Ukrayna Silahlı Qüvvələrinin Baxmut yaxınlığında cənub cinahda irəliləməsi barədə xəbərlər fonunda bildirib.
“Apta Alaudinovun komandanlığı altında “Axmat” xüsusi təyinatlıları xüsusi əməliyyat komandanlığı ilə Baxmut istiqamətinə köçürüldü. Bu, Baş Qərargahın etimadından və bölmənin yüksək döyüş qabiliyyətindən xəbər verir”, – Kadırov “Teleqram” kanalında yazıb.
Mayın sonunda Kadırov elan etdi ki, “DXR” Axmat xüsusi təyinatlılarının məsuliyyət zonasına çevrilib. Bununla belə, “Vaqner” qiyamı zamanı çeçen döyüşçüləri Maryinski istiqamətindən çıxarılaraq “antiterror əməliyyatı keçirmək” üçün Rostova göndərilib. Lakin onlar tıxacda ilişib Rostova çata bilməyiblər və qiyam bitəndən sonra yenidən cəbhəyə yollanıblar.
Bu arada Ukrayna Müdafiə nazirinin müavini Anna Malyar iyulun 9-da bildirib ki, Ukrayna Silahlı Qüvvələri Baxmut yaxınlığında cənub cinahda irəliləməyə davam edib. “Baxmutun özündə düşmən tələyə düşüb. Qoşunlarımız düşmənin hərəkətini mümkün qədər çətinləşdirib və oradan çıxmağı qeyri-mümkün edib”, – o deyib.
Azpost.info
