Aprelin 23-də “Zərri” Xəstə Uşaq və Gənclərə Kömək İctimai Birliyi təsis edilib.
Bu barədə yeni ictimai birliyin təsisçisi və sədri, Bakı şəhəri S. Abbasov adına 117 saylı tam orta məktəbin tarix müəllimi Kamal Hacıyev verib. Kamal Hacıyev ictimai birliyin təsis olunmasının məqsədi haqqında məlumat verib.
“Qan xərçəngindən əziyyət çəkən mərhum qızım Zərri Hacıyevanın Türkiyə Cümhuriyətində 3 illik müalicəsi dövründə ürək ağrıdan faktlarla rastlaşdım. Öncə müalicə zamanı Zərri üçün yardım kampaniyası təşkil edən yardımsevər dostlara, tanışlara, soydaşlarımıza dərin minnətdarlığımı bildirirəm. Ailə olaraq bu 3 ildə çox çətinliklər çəkdik. Amma məni üzən təkcə bu deyildi. Türkiyə Cümhuriyyətinin ayrı-ayrı şəhərlərinin klinikalarında müalicə alan onlarla azərbaycanlı gənc gördüm. Çoxunun nə özünün, nə də valideynlərinin bu xəstəlik və müalicənin gedişi ilə bağlı adi bilgiləri belə yox idi. İnsanlarımızı bilgisizlikdən, maddi problemlərdən əziyyət çəkən gördüm. Hələ Azərbaycanda elə insanların şahidi oldum ki, onların bölgələrdən Bakıya gəlib övladını müalicə etdirmək imkanı yoxdur”.
Kamal Hacıyev bildirib ki, yeni ictimai birliyi həyatdan nakam köçmüş mərhum qızının xatirəsini yaşatmaq üçün təsis edib: “İctimaiyyətə məlumdur ki, qızım Zərri bu il martın 8-də 21 yaşında müalicə aldığı Antalya klinikasında vəfat etdi. Onu qoruya bilmədim, amma özümə söz verdim ki, bundan sonra nə qədər ömrüm qalıbsa, xərçəng xəstəliyindən əziyyət çəkən uşaq və gənclərə köməyə həsr edəcəyəm. Xəstə uşaq və gənclərin, onların valideynlərinin maarifləndirilməsinə, onların doğru müalicə müəssisəsinə yönləndirilməsinə ehtiyac var. Yardımsevər iş adamları var ki, onlar xəstə soydaşlarımızın müalicəsinə etmək istəyirlər. Övladı xəstə olan ailələri tapacaq, onları ictimaiyyətə tanıdacaq, xeyirsevər iş adamlarının onlara diqqət ayırmasına çalışacağıq. Əgər kiməsə dəstəyimiz toxunarsa vicdanım mərhum qızımın ruhu qarşısında rahatlıq tapacaq”.
Kamal Hacıyev bildirib ki, həkimlərin də təmsil olunduğu ictimai birlik sağlam həyat tərzini təbliğ edəcək, xərçəng və digər ağır xəstəlikləri yaradan səbəblərlə bağlı vaxtaşırı maarifləndirmə işləri həyata keçirəcək.
“İctimai birliyin sıralarına həkim-ekspertlər, psixoloqlar, pedaqoqlar da cəlb edəcəyik. Onların iştirakı ilə təhsil ocaqlarında vaxtaşırı maarifləndirmə tədbirləri təşkil edəcək, kütləvi informasiya vasitələrində ictimai müzakirələrdə iştirak edəcəyik”
