Azərbaycanda bu il 343 min hektar əkin sahəsi sığortalanıb. Bu göstərici ölkənin ümumi əkin sahəsinin 24,5 faizini təşkil edir.
Bu barədə AZƏRTAC-a açıqlamasında Aqrar Sığorta Fondunun İdarə Heyəti sədrinin müavini Ləman Alıyeva-Məmişova bildirib.
Onun sözlərinə görə, Azərbaycanda illik orta hesabla 420-450 min hektar əkin sahəsi sığortalanır. Fond ölkənin əkin ərazilərinin 96 faizini, kənd təsərrüfatı istehsalının isə 95 faizini sığortalamaq imkanına malikdir.
“Ölkədə ümumilikdə əkin əraziləri 1,4 milyon hektarı əhatə edir. Fermerlərin aqrar sığortaya əlçatanlığının artırılması Aqrar Sığorta Fondunun, Kənd Təsərrüfatı Nazirliyinin və kənd təsərrüfatı ilə bağlı qəbul edilmiş Dövlət Proqramının əsas istiqamətlərindən biridir. Bu məqsədlə maarifləndirmə və təşviqat tədbirləri həyata keçirilir”, – deyə L.Alıyeva-Məmişova qeyd edib.
Fond rəsmisi fermerlər üçün əsas stimulun sığorta ödənişləri olduğunu vurğulayıb. Bildirib ki, bu ödənişlər təsərrüfatların fəaliyyətinin davamlılığını təmin edir və fermerlərin növbəti illərdə də aqrar sığortadan yararlanmaq marağını artırır.
Qeyd edək ki, hazırda Azərbaycanda ümumi əkin sahəsi 1,4 milyon hektardır. Bu il sığortalanan 343 min hektar ərazi həmin sahələrin təxminən dörddə birini əhatə edir.
