AZAL
“Azərbaycan Hava Yolları” (AZAL) 2027-ci il yanvarın 4-dən etibarən Bakı–İstanbul marşrutu üzrə bütün reyslərini yalnız İstanbul Beynəlxalq Hava Limanı (IST) vasitəsilə həyata keçirəcək.
Bu barədə AZAL-dan bildirilib.
Məlumata görə, dəyişiklik aviaşirkətin uçuş proqramının optimallaşdırılması çərçivəsində həyata keçirilir. Beləliklə, Bakıdan İstanbula uçuşlar Sabiha Gökçen hava limanından deyil, İstanbulun əsas beynəlxalq hava limanından təşkil olunacaq.
Şirkət qərarın məqsədinin uçuşların təşkilində səmərəliliyi artırmaq və sərnişinlərə daha geniş səyahət imkanları yaratmaq olduğunu açıqlayıb. Bildirilib ki, İstanbul Beynəlxalq Hava Limanının geniş beynəlxalq marşrut şəbəkəsi sərnişinlərə növbəti uçuşlarını planlaşdırmaq üçün daha əlverişli şərait yaradacaq.
Qeyd edək ki, Türkiyə mediasında AZAL-ın 2027-ci ilin əvvəlindən İstanbulun Sabiha Gökçen Beynəlxalq Hava Limanına uçuşları dayandıracağı barədə məlumatlar yayılıb.
AZAL Bakı–Sabiha Gökçen reyslərinə 2012-ci ilin mayında başlamışdı. Beləliklə, aviaşirkət təxminən 15 il davam edən bu istiqamətdəki fəaliyyətini başa çatdırır.
Qərar İstanbulun Anadolu yaxasında yerləşən Sabiha Gökçen hava limanından istifadə edən sərnişinlər üçün dəyişikliyə səbəb olacaq. Bundan sonra onlar AZAL-la İstanbula uçarkən şəhərin Avropa yaxasında yerləşən İstanbul Beynəlxalq Hava Limanından istifadə etməli olacaqlar.
