Rəsmi Bakı BMT-nin dörd ofisinin – BMT-nin İnkişaf Proqramı (UNDP), BMT-nin Əhali Fondu (UNFPA), BMT-nin Qaçqınlar üzrə Ali Komissarlığının (UNHCR) və BMT-nin Uşaq Fondunun (UNICEF) Azərbaycanda ofislərinin bağlanması təklifi ilə çıxış edib.
AzPost bildirir ki, bu barədə APA məlumat yayıb.
APA-nın əldə etdiyi məlumata görə, Azərbaycan hökuməti artıq BMT-nin 4 yerli ofisi ilə yanaşı Beynəlxalq Qırmızı Xaç Komitəsi (ICRC) və Miqrasiya Siyasətinin İnkişafı üzrə Beynəlxalq Mərkəzin (ICMPD) də yerli nümayəndəliyinin bağlanması ilə bağlı bildiriş göndərib.
Hökumətin əsaslandırmasına görə, bir halda ki bu qurumların Azərbaycanda məşğul olacaqları bir iş qalmayıb, onların ofisinin fəaliyyət göstərməsinin də mənası yoxdur. Azərbaycan, əslində, hazırda maliyyə resursu məhdud olan BMT-yə yardım edib. Onu əlavə ofislər saxlamaqdan xilas edir. BMT isə bu resursları konkret böhran zonalarına, ən çox ehtiyac duyulan ölkələrə yönəldə bilər.
Məlumatda deyilir ki, digər beynəlxalq təşkilatlar kimi, BMT-nin strukturları da uzun illər ərzində Azərbaycana münasibətdə heç də ürəkaçan fəaliyyət göstərməyib.
Azərbaycan vaxtilə məcburi köçkünlər məsələsini qaldıranda BMT-nin Qaçqınlar üzrə Ali Komissarlığı (UNHCR) bu məsələnin onların mandatına uyğun olmadığını bildirdi. UNHCR mandatının məcburi köçkünlər deyil, qaçqınlarla məşğul olmaq olduğunu vurğulayırdı.
UNHCR-in 2021-ci ildə Azərbaycan tərəfinin təkidinə baxmayaraq, keçmiş Dağlıq Qarabağ Muxtar Vilayətinin tərkibinə daxil olan Talış kəndinə getmək istəməməsi də unudulmayıb. Daha sonra təşkilat yalnız “ictimailəşdirilməmək şərti ilə” əraziyə baş çəkə biləcəyini qeyd etmişdi.
UNDP də bu sırada yer alır. 2022-ci il avqustun 27-də Şuşada işğaldan azad edilmiş ərazilərdə bərpa və yenidənqurma sahəsində görülən işlər, minatəmizləmə və digər aidiyyəti məsələlərə həsr olunmuş beynəlxalq konfrans təşkil edilmişdi. BMT İnkişaf Proqramının (UNDP) Azərbaycandakı nümayəndəsi Şuşa şəhərinə səfərdən imtina etmişdi. Azərbaycan tərəfində olan məlumata görə, Vətən müharibəsindən sonra keçmiş Dağlıq Qarabağ ərazisinə keçməmələri ilə bağlı BMT-dən onlara qeyri-rəsmi təlimat gəlmişdi.
Azərbaycan hökuməti BMT ilə əməkdaşlığı davam etdirmək niyyətini dəfələrlə qeyd edib. Azərbaycan 2026-cı ildə World Urban Forumuna ev sahibliyi də edəcək. Ümumdünya Şəhər Forumu (WUF) 2001-ci ildə məhz BMT tərəfindən yaradılıb.
Bu isə onu deməyə əsas verir ki, Azərbaycanın BMT ilə əməkdaşlığı davam edəcək. Bu əməkdaşlıq birbaşa BMT-nin mərkəzi qərargahı və ya regional ofisləri ilə qurulacaq. Buna səbəb isə bəzi təşkilatların Azərbaycan nümayəndəlikləri ilə bağlı yaranmış çoxsaylı suallar, bəzi təşkilatların isə öz işini yeni dövrün tələblərinə uyğun qura bilməməsi və fəaliyyətsizliyidir.
