Tofiq Bəhramov adına Respublika Stadionunun arxasındakı yaşıllıq ərazidə bəzi ağaclar kəsilib. AzPost xəbər verir ki, bu barədə sosial şəbəkələrdə videolar yayılıb. Hər gün yolu bu ərazidən keçən vətəndaşların sözlərinə görə, kəsilən ağaclar saf olub.
Ağacların kəsilməsinin hansı məqsəd daşıdığı bəlli deyil. Yaşıllıq ərazini seyrəltməklə hər hansı obyektlərin orada “göbələk” kimi bitmə ehtimalı da istisna edilmir.
Qeyd edək ki, İnzibati Xətalar Məcəlləsinin 253.2-cim maddəsinə əsasən fiziki şəxslər iki min manat miqdarında, vəzifəli şəxslər dörd min manat miqdarında, hüquqi şəxslər iyirmi beş min manat miqdarında cərimə edilir.
Bu əməl şəhərlərdə və digər yaşayış məntəqələrində yerləşən yaşıllıq sahələrində tikinti və abadlaşdırma işləri aparılarkən törədildikdə, hər bir ağacın və ya kol əkililərinin məhv edilməsinə, habelə qanunsuz kəsilməsinə (götürülməsinə) görə isə fiziki şəxslər iki min iki yüz manat miqdarında, vəzifəli şəxslər beş min manat miqdarında, hüquqi şəxslər otuz beş min manat miqdarında cərimə edilir.
Qeyd edək ki, bu əməllər Azərbaycan Respublikasının Cinayət Məcəlləsinin müvafiq maddələrinə əsasən cinayət məsuliyyətinə səbəb olmadıqda tətbiq edilir.
Meşələrdə və ya xüsusi mühafizə olunan təbiət ərazilərində ağacların, kolların və ya digər yaşıllıqların, eləcə də meşə fonduna daxil olmayan ağacların, kolların və ya digər yaşıllıqların qanunsuz kəsilməsi (götürülməsi) xeyli miqdarda ziyan vurduqda isə Cinayət Məcəlləsinin 259-cu maddəsi cinayət məsuliyyətinə səbəb olur.
Dövlət Ekoloji Ekspertiza Agentliyinin mətbuat katibi Elnur Ağayev AzPost-a bildirib ki, ağacların kəsilməsi qanunauyğun şəkildə həyata keçirilib.
“Nəriman Nərimanov rayonu Alı Alıyev küçəsi, Əhməd bəy Ağaoğlu küçəsi, Tofiq Bəhramov adına Respublika Stadionunun arxasında əsasən şam ağaclarında xəstəliklərin yaranması faktı aşkarlanıb. Bu vəziyyətlə bağlı ölkəmizdə beş müxtəlif qurumun əməkdaşlarından ibarət monitorinq qrupu yaradılıb ə qeyd olunan əraziyə baxış keçirilib”.
Agentlik rəsmisi bildirib ki, şam ağacları uzun müddətdir ki, naməlum xəstəlik səbəbindən saralıb quruyurdu.
“Əhməd bəy Ağaoğlu küçəsindəki həmin qurumuş ağaclarla bağlı Agentliyimiz tərəfindən rəy verilib. Burada hər hansı qanunsuz ağac kəsilməyib. Qurumuş ağaclar kəsilib və yerinə yerli iqlimə uyğun yeni ağaclar əkilib”.
AzPost MEDİA
