İnsan əlindəki barmaqların müxtəlif uzunluqda olması təsadüfi deyil. Onların ölçüsü, forması və bir-birindən müstəqil hərəkət edə bilməsi əlin həm güclü tutuş, həm də dəqiq hərəkətlər həyata keçirməsinə imkan verir.
Bu barədə The Conversation yazır.
Orta barmaq adətən əlin ən uzun barmağıdır və əlin hərəkətlərində bir növ mərkəzi dayaq rolunu oynayır. O, digər barmaqlarla birlikdə əşyaları daha etibarlı tutmağa kömək edir.
Adsız barmaq orta barmaqdan bir qədər qısa olur və çox vaxt onunla birlikdə işləyir. Ağır çanta, bel çantası və ya idman avadanlığını tutarkən əlin güc və sabitliyinin təmin edilməsində iştirak edir.
Şəhadət barmağı isə yüksək hərəkətlilik qabiliyyəti ilə seçilir. Kiçik düymələrə basmaq, yazmaq, klaviaturadan istifadə etmək və müəyyən bir əşyanı göstərmək kimi dəqiq hərəkətlərdə əsas rol oynayır.
Çeçələ barmaq kiçik olsa da, əlin fəaliyyətində mühüm əhəmiyyət daşıyır. O, ovucun xarici kənarını dəstəkləyir və iri və ya ağır əşyaları tutarkən əlin sabitliyini artırır.
Baş barmaq digər barmaqlardan ən çox fərqlənəndir. Onun əsas üstünlüyü uzunluğunda deyil, quruluşundadır. Baş barmaq digər barmaqların qarşısına gələ və onlara doğru hərəkət edə bilir. Bu xüsusiyyət əlin dəqiqliyini xeyli artırır.
Məhz baş barmağın köməyi ilə insan qaşıq tuta, xırda əşyaları götürə, qapaqları aça və gündəlik çoxsaylı hərəkətləri yerinə yetirə bilir.
Barmaqların uzunluğu niyə fərqlənir?
Mənbəyə görə, insan əli təkamül prosesində həm güc, həm də dəqiqlik tələb edən fəaliyyətlərə uyğunlaşıb. Əlin quruluşu ağır əşyaları saxlamağa, eyni zamanda çox dəqiq hərəkətlər etməyə imkan verir.
Barmaqların uzunluğu və nisbətləri isə bütün insanlarda eyni deyil. Bu xüsusiyyətlərə genlər və hormonlar təsir göstərir. İrsi xüsusiyyətlərlə yanaşı, ətraf mühit və gündəlik fiziki fəaliyyət də əllərin gücü və koordinasiyasına təsir edə bilər.
Nəticədə hər barmaq özünəməxsus funksiyaya malikdir və onların birlikdə fəaliyyəti insan əlini həm güclü, həm də son dərəcə dəqiq hərəkətlər edə bilən orqana çevirir.
