Belarus Londonun xoşagəlməz addımları fonunda Britaniyadakı səfirini geri çağırıb.
Azpost.info xəbər verir ki, bu barədə Belarus Xarici İşlər Nazirliyinin nümayəndəsi Anatoli Qlaz bildirib.
Onun sözlərinə görə, diplomatik mövcudluq Britaniya hökumətində məsulliyyətli siyasətçilər olduqda bərpa olunacaq.
“Böyük Britaniya tərəfindən sistematik olaraq Belarus vətəndaşlarına və hüquqi şəxslərinə maksimum ziyan vurmağa yönəlmiş bir sıra qeyri-dost addımlar atılır. Bununla əlaqədar ölkəmizin Londondakı diplomatik missiyasının səviyyəsinin aşağı salınması barədə qərar qəbul edilib”, – Qlaz qeyd edib.
XİN yetkilisi əlavə edib ki, səfirin geri çağırılması Minsk və Londonun rabitə kanallarının bağlanacağı anlamına gəlmir.
Qeyd edək ki, Minsk və London arasında siyasi əlaqələr 2020-ci ildən kəsilib. Britaniya Aleksandr Lukaşenkonun legitimliyini tanımır və respublikaya sanksiya təzyiqinin təşəbbüskarlarından biridir.
Azpost.info
