13 oktyabr tarixində Beyləqan şəhər Humanitar Fənlər Təmayüllü Liseyin akt zalında Qeyri-Hökumət Təşkilatlarına Dövlət Dəstəyi Agentliyinin dəstəyi və “Qayıdış” İctimai Birliyinin təşkilatçılığı ilə “Mədəni irsimiz: Örənqala – torpaq altında qalmış şəhər” adlı seminar keçirilib.
Seminarda rayon ziyalıları, alimlər, mədəniyyət və təhsil işçiləri, eləcə də məktəblilər iştirak ediblər. Əvvəlcə Dövlət Himni səsləndirilib və torpaqlarımızın azadlığı uğrunda şəhid olan qəhrəmanlarımızın xatirəsi bir dəqiqəlik sükutla yad edilib. Seminar iştirakçılarını salamlayan “Qayıdış” İctimai Birliyinin sədri Şamxal Rəhimov “Mədəni irsimiz: Örənqala – torpaq altında qalmış şəhər” layihəsi barədə geniş məlumat verib.
AMEA Arxeologiya və Etnoqrafiya İnstitutunun şöbə müdiri, tarix üzrə fəlsəfə doktoru Mikayıl Mustafayev çıxış edərək rayon ərazisində yerləşən qədim Örənqala yaşayış yeri haqqında məruzə edib. O qeyd edib ki, Örənqala V əsrə aid abidədir və aparılan arxeoloji qazıntılar nəticəsində onun qədim Beyləqan şəhərinin qalıqları olduğu sübuta yetirilib. Sonra o, qazıntılar zamanı Örənqala yaşayış yerindən tapılmış və hazırda Beyləqan Rayon Tarix-Diyarşünaslıq Muzeyində saxlanılan eksponatlar barədə geniş məlumat verib, qədim tariximizin öyrənilməsi baxımından bu tapıntıların əhəmiyyətini vurğulayıb. Daha sonra Mikayıl Mustafayev seminar iştirakçılarının suallarını cavablandırıb.
Tədbirdə Azərbaycan Respublikasının Əməkdar müəllimi, Prezident təqaüdçüsü Səxavət Tağlar, AMEA Arxeologiya və Antropologiya İnstitutunun əməkdaşı, tarix üzrə fəlsəfə doktoru Zaur Həsənov, şair-publisist Rövşən Qarabudaq, Beyləqan Rayon Tarix-Diyarşünaslıq Muzeyinin əməkdaşı Natiq Quliyev və AYB Beyləqan Bölməsinin məsul katibi, Prezident təqaüdlü şair Raquf Budaqlı çıxış edərək Örənqala abidəsinin tarixi və mədəni əhəmiyyətindən danışıblar.
Sonda diskussiya təşkil olunub. “Qayıdış” İctimai Birliyinin əməkdaşları və tədbirdə iştirak edən alimlər iştirakçıların suallarını cavablandırıblar.
Seminarın sonunda “Qayıdış” İctimai Birliyinin hazırladığı “Mədəni irsimiz: Örənqala – torpaq altında qalmış şəhər” adlı kitabça iştirakçılara təqdim edilib.
Seminardan sonra ictimai birliyin əməkdaşları və qonaqlar Beyləqan Rayon Mərkəzləşdirilmiş Kitabxana Sistemində görüş keçiriblər. Görüşün sonunda kitabxanaya yüz nüsxə kitabça hədiyyə olunub. Bununla da seminarın işi yekunlaşıb.
