Bir böyrü üstə yatmaq, adətən, sağlamlıq üçün təhlükəli hesab olunmur. Lakin bəzi hallarda bu vəziyyət səhərlər qolun keyiməsinə, çiyin ağrısına, boyunda gərginliyə və bədənin sanki əyilmiş vəziyyətdə olması hissinə səbəb ola bilər.
Bu barədə terapevt Svetlana Burnatskaya “Lenta.ru”ya açıqlamasında bildirib.
Həkimin sözlərinə görə, yaranan xoşagəlməz hisslərin səbəbi çox vaxt yuxu vəziyyətinin özü deyil, yanaşı xəstəliklər və yataq şəraitinin düzgün təşkil olunmamasıdır.
Məsələn, çox hündür və ya çox alçaq yastıq başın onurğaya nisbətən qeyri-təbii bucaq altında qalmasına səbəb ola bilər. Bu isə səhərlər boyunda gərginlik və ağrı ilə nəticələnə bilər.
Bundan başqa, uzun müddət eyni çiyin və bud nahiyəsinə təzyiq düşməsi səhər saatlarında ağrı, sərtlik və ya keyimə yarada bilər.
Sol, yoxsa sağ böyrü üstə yatmaq?
Həkim yuxu vəziyyətinin qastroezofageal reflüks xəstəliyinin (QERX) simptomlarına da təsir göstərə biləcəyini qeyd edib.
Bu xəstəlik zamanı bir çox insanda sol böyrü üstə yatmaq reflüks epizodlarının daha az olması ilə əlaqələndirilir. Əksinə, sağ böyrü üstə yatmaq bəzi insanlarda gecə saatlarında mədə yanmasını artıra bilər.
Bunun səbəbi mədə möhtəviyyatının qida borusuna geri qayıtması ilə bağlıdır. Lakin bu təsir bütün insanlarda eyni olmaya bilər.
Bir tərəfdə yatmaq nə vaxt problem yaradır?
Mütəxəssis sağlam insanlara bir böyrü üstə yatmağı qəti şəkildə qadağan etmək üçün əsas olmadığını vurğulayıb.
Əsas problem insanın uzun müddət narahat vəziyyətdə yatması və eyni əzələlərə, oynaqlara və yumşaq toxumalara davamlı yük düşməsidir.
Bu səbəbdən səhərlər mütəmadi olaraq qol keyiməsi, çiyin və boyun ağrısı yaranırsa, ilk növbədə yastığın hündürlüyünü və yatış vəziyyətini nəzərdən keçirmək faydalıdır.
Yastıq başı nə çox yuxarı, nə də aşağı vəziyyətdə saxlamamalı, boyun isə mümkün qədər onurğanın təbii xəttini davam etdirməlidir.
Əgər ağrı və keyimə yalnız yuxudan sonra deyil, gün ərzində də davam edirsə və ya tez-tez təkrarlanırsa, bunun səbəbi yalnız yuxu vəziyyəti olmaya bilər. Belə hallarda həkim müayinəsi tələb oluna bilər.
Bir böyrü üstə yatmaq öz-özlüyündə zərərli vərdiş deyil. Əsas məsələ bədənin rahat vəziyyətdə olması, boyun və onurğanın düzgün dəstəklənməsi və eyni nahiyələrə uzun müddət həddindən artıq təzyiq düşməməsidir.
