Rusiyanın “Aeroflot” şirkətinə məxsus “Boeing 777” təyyarəsi eniş şassisi zədələndiyi üçün Phuketdən Moskvaya uça bilməyib.
Azpost.info xəbər verir ki, SU275 reysi ləğv edilib.
Aviaşirkət iddia edir ki, qəza Tayland hava limanında yerüstü xidmət işçilərinin hərəkətləri nəticəsində baş verib. Sərnişinlər başqa reyslərə yönləndirilib. Gözləyərkən insanlar yemək və içki ilə təmin olunublar. Onların mehmanxanada qalması da təşkil olunub.
Bundan başqa, Türkiyəyə uçan 400 “Aeroflot” sərnişini Moskvada ilişib qalıb. Onları iki dəfə Antalyaya çatdırmağa çalışıblar. Mühərrikin yanması səbəbindən birinci təyyarə təcili olaraq hava limanına qaytarılıb. İkinci təyyarə də xarab olub, onu təmir etmək 1,5 saat çəkib. Nəticədə sərnişinlər Türkiyəyə yalnız bazar ertəsi səhər səkkiz saat gecikmə ilə uça biliblər. Kompensasiya olaraq onlara 600 rubl dəyərində kuponlar verilib.
“Novaya qazeta” yazır ki, Rusiya aviaşirkətlərinin təyyarələri uçuş zamanı iki dəfə tez sıradan çıxmağa başlayıb. 2023-cü ilin yanvar-avqust aylarında 120-dən çox belə hal qeydə alınıb. Əvvəlki beş ilin eyni dövründə bu rəqəm 55 olmuşdu.
Azpost.info
