Birmarket onlayn ticarət platforması müştəri narazılığı ilə üzləşib.
AzPost xəbər verir ki, Kənan Qədimov adlı istifadəçi sosial şəbəkə hesabında aldığı məhsulun nasaz olması səbəbindən geri qaytarmaq istədiyini, lakin şirkətin bunu qəbul etmədiyini bildirib.
Şikayətçiyə görə, o, portativ kondisioner aldığını düşünsə də, məhsul yalnız vintilyator funksiyası daşıyır və soyutma effekti demək olar ki, yoxdur. Məhsulu sınaqdan keçirdikdən dərhal sonra geri qaytarmağa çalışsa da, Birmarket tərəfindən texniki səbəblər göstərilərək bu imtina edilib.
Qədimov qeyd edib ki, məhsuldan istifadə olunmayıb, qablaşdırma və qəbz saxlanılıb. Şirkətlə əlaqə saxladıqda isə ona bildirilib ki, “vintilyator” kimi qeyd olunan məhsullar qaytarılmır. Müştəri isə məhsulun həm də “portativ kondisioner” adı ilə satıldığını və alıcıda yanlış təəssürat yaratdığını vurğulayıb.
Şikayətçi son olaraq bildirib ki, Birmarketdən alış-veriş etməyəcək və yaxın çevrəsini də bu platformadan uzaq tutmağa çalışacaq. O, problemin həll olunmaması halında ödənişi ləngitməklə etirazını davam etdirəcəyini açıqlayıb.
Qarşı tərəfin mövqeyini dərc etməyə hazırıq.
