Son onilliklərdə urbanizasiya dünyanın əsas sosial proseslərindən birinə çevrilib. İnsanlar daha yaxşı iş, təhsil və səhiyyə imkanları üçün kəndlərdən şəhərlərə köçürlər.
Azpost.info bildirir ki, Azərbaycanda da oxşar tendensiya müşahidə olunur. Bakı ölkə əhalisinin və iqtisadi fəaliyyətin böyük hissəsini özündə cəmləşdirir. Bununla yanaşı, Sumqayıt, Gəncə və Mingəçevir kimi şəhərlərin inkişafı da sürətlənir.
Sosioloq Əhməd Qəşəmoğlu bildirir ki, urbanizasiya iqtisadi inkişafın təbii nəticəsidir: “İnsanlar daha çox imkan olan yerlərə üz tuturlar. Lakin regionlarda iş yerlərinin yaradılması daxili miqrasiyanın sürətini azalda bilər.”
Ekspertlər hesab edirlər ki, Qarabağ və Şərqi Zəngəzurda həyata keçirilən layihələr yeni iqtisadi mərkəzlərin formalaşmasına səbəb ola bilər. Ağdam, Füzuli və Zəngilan şəhərlərində yaradılan sənaye və logistika layihələrinin bölgəyə investisiya cəlb etməsi gözlənilir.
Analitiklərin fikrincə, gələcəyin uğurlu şəhərləri təkcə böyük əhali ilə deyil, keyfiyyətli infrastruktur, ekoloji mühit və rəqəmsal xidmətlərlə fərqlənəcək. Bu səbəbdən şəhərsalma siyasəti qarşıdakı illərdə ölkələrin inkişaf strategiyalarında əsas yer tutacaq.
S. Abdulla
