Böyük Britaniyanın İrandakı səfiri artıq ikinci dəfədir ki, Xarici İşlər Nazirliyinə (XİN) çağırılaraq İran hökumətinin etiraz notasını alır.
Bu gün səhər İran XİN-ə çağırılan səfir Saymon Şerkliffə Böyük Britaniyanın Xarici İşlər Nazirliyinin yaydığı bəyanatla bağlı etiraz bildirilib. Qeyd olunub ki, İranın daxili işlərinə qarışmaq yolverilməzdir. İran hökuməti Britaniya XİN-in İranda insan hüquqlarının pozulmasi və demokratiyanın inkişafına maneə törədilməsi barədə bəyanatını təxribat adlandırıb.
Səfirin nəzərinə çatdırılıb ki, Britaniya birtərəfli və qeyri-obyektiv bəyanatları ilə faktiki olaraq İranda iğtişaşların davam etməsinə yardım edir. Rəsmi London bu kimi bəyanatlar səsləndirməyə davam edərsə, İran cavab tədbirləri görmək məcburiyyətində qalacaq.
Səfir İran hökumətinin etirazını öz hökumətinə çatdıracağını bildirib.
