“Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti” PHŞ tərəfindən keçirilən tenderlərin nəticələri açıqlanıb.
FED.az xəbər verir ki, qurumun 2 tenderinə yekun vurulub. Belə ki, “Promor” MMC (VÖEN: 1804902651) Ağdərə rayonu Çıldıran və Vəngli kəndlərində 94, Xocalı rayonunun Mehdibəyli, Pirlər və Daşbulaq kəndlərində isə 155 fərdi yaşayış evinin cari təmirinin layihələndirilməsi işlərini həyata keçirəcək. Müqavilənin dəyəri 240 425 AZN təşkil edir.
Qeyd edək ki, “Promor” MMC 2020-ci ildə yaradılıb, nizamnamə kapitalı 50 000 AZN təşkil edir. Şirkətin qanuni təmsilçisi Hasan Bakirovdur. Hüquqi ünvanı AZ1108, Bakı şəhəri, Nərimanov rayonu, Ziya Bünyadov küçəsi, ev 2, məhəllə 1965 ünvanında yerləşir.
Digər tenderin qalibi “Monotech AZ” MMC (VÖEN: 1905300181) olub. Şirkət Ağdərə rayonunun Aşağı Oratağ və Heyvalı kəndlərində 90, Xocalı rayonunun Badara, Xanabad, Seyidbəyli və Daşbulaq kəndlərində isə 151 fərdi yaşayış evinin cari təmirinin layihələndirilməsini yerinə yetirəcək. Bu müqavilənin dəyəri isə 208 447 AZN-dir.
Qeyd edək ki, “Monotech AZ” MMC 2022-ci ildə yaradılıb, nizamnamə kapitalı 10 AZN təşkil edir. Şirkətin qanuni təmsilçisi Ömər Məmmədəlizadə Mübariz oğludur. Hüquqi ünvanı Bakı şəhəri, Suraxanı rayonu, Qaraçuxur ŞTQ, Şərq sahəsi (Qaraçuxur qəs.), ev 16, m.168 ünvanında yerləşir.
Hər iki layihə üzrə ümumi sifariş məbləği təxminən 449 min AZN təşkil edir.
