Baş ağrısının şiddəti həmişə onun nə dərəcədə təhlükəli olduğunu göstərmir. Çünki orta dərəcəli, lakin qəfil başlayan ağrı belə ciddi fəsadın ilk əlaməti ola bilər.
Bu barədə nevroloq Əli İsmayılov “Lenta.ru”ya açıqlamasında bildirib.
Mütəxəssisin sözlərinə görə, saniyələr ərzində maksimum şiddətə çatan, qəfil və ildırım sürətli baş ağrısı yarandıqda dərhal təcili yardım çağırmaq lazımdır. Bu əlamət beyin qişaları arasındakı sahəyə qanaxma — subaraxnoidal qansızma riski ilə əlaqəli ola bilər. Pasiyentlər bu ağrını çox vaxt başın içində partlayış baş verməsi kimi təsvir edirlər.
Baş ağrısı ilə yanaşı aşağıdakı nevroloji pozuntuların yaranması da ciddi narahatlıq doğurmalıdır:
-
Qollarda və ya ayaqlarda zəiflik;
-
Üzün bir tərəfində əyrilik və ya asimmetriya;
-
Nitq və görmə pozuntuları;
-
Şüurun qarışması;
-
Yüksək hərarətlə yanaşı boyun əzələlərinin sərtləşməsi.
Hamilə qadınlarda ilk dəfə yaranan güclü baş ağrısına da xüsusi diqqət yetirilməlidir. Belə hallarda ağrıkəsici qəbul edib gözləmək yolverilməzdir.
İsmayılovun qeyd etdiyi digər təhlükə isə dərmanların təsiri nəticəsində yaranan baş ağrısıdır. Bu problem ağrıkəsicilərin müntəzəm istifadəsi zamanı meydana çıxa bilər.
Mütəxəssisin sözlərinə görə, sadə ağrıkəsicilərin ay ərzində 15 və daha çox gün, triptanların və kombinə edilmiş preparatların isə üç ay ərzində ayda 10 və daha çox gün istifadəsi baş ağrısının dərmanla əlaqəli formasının yaranmasına səbəb ola bilər.
Belə vəziyyətdə ağrını aradan qaldırmaq üçün qəbul edilən dərman özü yeni ağrı tutmalarını tətikləyə bilər. Dərmandan asılılığın aradan qaldırılması isə həkim nəzarəti altında aparılmalıdır.
