İsrailin Palmahim çimərliyində Misir ilahəsi Hathorun 3000 ildən çox yaşı olan heykəlcik aşkar edilib.
Azpost.info bildirir ki, bu barədə “The Jerusalem Post” məlumat yayıb.
Nəşrin məlumatına görə, artefaktı İsrail vətəndaşı suyun içində tapıb. O, dərhal başa düşüb ki, bu sadə bir daş deyil.
İsrail Qədim Əşyalar İdarəsinin Tunc dövrü üzrə mütəxəssisi Qolani bildirib ki, ibadət üçün istifadə edilən və adətən Misir ilahəsi Hathor ilə eyniləşdirilən bu cür heykəlciklər son Tunc dövrü və erkən Dəmir dövrü Kənan mədəniyyəti üçün xarakterikdir.
Qəzet yazır ki, əhali o dövrdə bölgəyə hakim olan misirlilərin ritual və dini adətlərini mənimsəyiblər. Onlar ritual heykəlciklərdən məişət ziyarətgahı kimi istifadə edirdilər. Kiçik zədələrə baxmayaraq, elm adamları bunun böyük ehtimalla ilahə Hathorla bağlı olduğunu müəyyən edə biliblər. Heykəlcik gildən hazırlanıb və bu ilahənin təsvirlərinin bir çox xarakterik xüsusiyyətlərinə, xüsusən də öküz buynuzlarını təqlid edən saç düzümü, həmçinin qabarıq gözlərə malikdir.
Hathor qədim Misir panteonunun əsas tanrıçalarından biridir. O, qadınların himayədarı, gözəlliyin və analığın təcəssümü hesab olunurdu.
Azpost.info
