“China Eastern Airlines” şirkətinin martın 21-də qəzaya uğramış “Boeing 737-800” təyyarəsindəki sərnişinlərin axtarışları hələ nəticə verməyib.
Azpost.info-nun məlumatına görə, axtarış əməliyyatına 1200-ə yaxın yanğınsöndürən, 100-dən çox texnika, 80 tibb işçisi, polis və hərbçilər, yerli sakinlər cəlb olunub. Təyyarənin bəzi qalıqları tapılsa da, sərnişin və heyət üzvlərinin axtarışları hələlik nəticə verməyib. Qəzanın baş verdiyi ərazi dağlıq və sıx meşə olduğundan axtarış işləri çətinliklə aparılır. Hadisə şahidlərindən biri yerli mediaya bildirib ki, təyyarə dağa çırpılandan sonra tamamilə dağılıb, ardından yanğın yaranıb.
“China Eastern Airlines” şirkəti qəza ilə əlaqədar 9 işçi qrup yaradıb. Bu qruplar hadisənin təhqiqatı, təyyarədə olan sərnişinlərin ailələrinə dəstək, logistika, hüquqi işlər, maliyyə və digər məsələlərlə məşğul olur.
Qeyd edək ki, göyərtəsində 123 sərnişin və 9 heyət üzvünün olduğu təyyarə Kunmin şəhərindən Quancou istiqamətində uçarkən Quansi Cuan muxtar bölgəsində qəzaya uğrayıb. Çin Mülki Aviasiya İdarəsinin məlumatına əsasən, təyyarə yerli vaxtla 13:15-də havaya qalxdıqdan təxminən 1 saat 10 dəqiqə sonra radarlardan itib. Altı ildən çoxdur istifadədə olan təyyarə Tensiən rayonunda dağa çırpılıb və alışıb. “Boeing” şirkəti qəza barədə məlumatları araşdırdığını açıqlayıb. ABŞ-ın Federal Aviasiya Administrasiyası qəzanın təhqiqatına dəstək göstərməyə hazır olduğunu bəyan edib. ABŞ Nəqliyyatda Təhlükəsizlik Milli Bürosu hadisənin araşdırılması üçün məsul şəxs təyin edib.
Qəzaya uğrayan təyyarədə əcnəbi sərnişinlərin olmadığı bildirilir.
