Danimarkanın Olborq şəhərində yerləşən zoopark yerli sakinlərə qeyri-adi müraciət edib.
AzPost xəbər verir ki, sosial şəbəkələrdə yayılan açıqlamada zoopark rəhbərliyi vətəndaşlardan artıq saxlamadıqları sağlam ev heyvanlarını – məsələn, toyuq, dovşan və dəniz donuzu kimi növləri zooparka təhvil vermələrini xahiş edib.
Müraciətdə bildirilir ki, yırtıcı heyvanların qidalanması onların təbii mühitdə aldıqları yemlə uyğun olmalıdır. Bu səbəbdən zoopark heyəti belə heyvanların onların menyusunun “vacib hissəsi” olduğunu qeyd edir.
Zoopark rəhbərliyi həmçinin vurğulayıb ki, bağışlanan heyvanlar insani və ağrısız şəkildə öldürüləcək. Bu yanaşmanın məqsədi yırtıcıların təbii davranışlarını qorumaq və onların rifahını təmin etməkdir.
Məsələ sosial mediada geniş müzakirələrə səbəb olub. Bəziləri bu addımı qəddar sayır, digərləri isə təbiət qanunlarının zoopark şəraitində də qorunmasının tərəfdarıdır. Zoopark isə bildirir ki, bu cür qidalanma yırtıcıların sağlamlığı və davranış tarazlığı üçün vacibdir.
Danimarkada belə təşəbbüs ilk deyil – bəzi zooparklar artıq uzun illərdir bu praktikadan istifadə edir. Lakin bu cür ictimai müraciət nadir hallarda rast gəlinir.
