Dövlət İmtahan Mərkəzinin (DİM) peşəkar mühasib sertifikatı (PMS) imtahanları ilə bağlı sualların cavablandırılması və təkliflərin səsləndirilməsi məqsədilə aprelin 29-da Gənc Mühasiblər İctimai Birliyi ilə panel müzakirə təşkil edib.
Bu barədə DİM-dən məlumat verilib. Tədbir DİM-in Strateji inkişaf şöbəsinin müdiri Vəli Hüseyn və Gənc Mühasiblər İctimai Birliyinin sədri Solmaz Əliyevanın açılış nitqləri ilə başlanıb.
Tədbirdə iştirakçıların sualları DİM-in Yoxlama-ölçmə materiallarının işlənməsi departamentinin müdiri Natiq Əliyev, Maliyyə Nazirliyinin Uçot siyasəti şöbəsinin müdiri Firuzə Abdullayeva, Dövlət Vergi Xidmətinin Vergi siyasəti baş idarəsinin Qanunvericiliyin monitorinqi və sahibkarlıq subyektləri ilə iş idarəsinin rəisi Əhməd Əhmədov, Dövlət Vergi Xidmətinin Tədris Mərkəzinin rəisi vəzifəsinin müvəqqəti icraçısı Mirəli Kazımov, Maliyyə Elm-Tədris Mərkəzinin direktoru vəzifəsinin müvəqqəti icraçısı Gülşən Orucova tərəfindən cavablandırılıb. Məhsuldar keçən müzakirə zamanı iştirakçılar tərəfindən PMS imtahanlarının təkmilləşdirilməsi istiqamətində təkliflər də səsləndirilib.
Görüşdə birbaşa iştirak edə bilməyən şəxslərin mövzu ilə bağlı suallarını cavablandırmaq məqsədilə tədbir DİM-in feysbuk hesabı vasitəsilə canlı yayımlanıb. Yayıma verilən linkdən baxa bilərsiniz.
Xatırladaq ki, aprelin 15-də DİM, Maliyyə Nazirliyi yanında Maliyyə Elm-Tədris Mərkəzi, İqtisadiyyat Nazirliyi yanında Dövlət Vergi Xidmətinin Tədris Mərkəzi, Azərbaycan Professional Maliyyə Menecerləri Assosiasiyası, Azərbaycan Mühasiblər və Risk Peşəkarları Assosiasiyası və Gənc Mühasiblər İctimai Birliyi arasında anlaşma memorandumu imzalanıb. Memorandumu “Peşəkar mühasib sertifikatının verilməsi prosesinin təşkili, imtahanların keçirilməsi və peşəkar mühasib sertifikatı almış şəxslərin dövlət reyestrinin aparılması Qaydaları”nın təsdiq edilməsi haqqında Nazirlər Kabinetinin 2019-cu il 22 may tarixli Qərarını əsas götürərək PMS üzrə imtahanların məzmunu və strukturunun təkmilləşdirilməsi və təbliği, maliyyə, mühasibat və vergi uçotu sahəsindəki yeniliklərin geniş ictimaiyyətə birgə çatdırılması və tətbiqi, eləcə də qeyd edilən sahələr üzrə mütəxəssislərin peşəkar inkişafına dair qarşılıqlı əməkdaşlıq məqsədi daşıyır.
