Çilidə dünyanın ən quraq səhrası olan Atakamada güllər açılıb.
AzPost Reuters-ə istinadən xəbər verir ki, cənub yarımkürəsində sentyabrdan noyabr ayına qədər olan dövr yaz hesab olunur. Ona görə də bu quraq bölgədə bitki örtüyünün görünməsi fəsillərin dəyişməsi ilə bağlıdır. Bununla belə, hətta bu zamanda Atakamada çiçəklənmə nadir bir hadisədir. Bu, bir neçə ildən bir dəfə baş verir. Yalnız bu il olduğu kimi, səhrada yağış olduqda gül-çiçək bitir.
Çilidəki Andres Bello Universitetinin bioloqları sərt səhra iqliminə müqavimət göstərən və sentyabrın sonu və oktyabrın əvvəllərində səhra səthini çiçək xalçası ilə örtən bənövşəyi çiçəkli bitkini müşahidə ediblər. Onlar təklif edirlər ki, yerli əhalinin “guanako dırnağı” (quanako lamayabənzər məməli heyvandır) adlandırdığı bu çiçəyin genetik kodu qlobal istiləşmə fonunda quraqlığa davamlı məhsullar yetişdirmək üçün açar ola bilər. Alimlər indi bu fərziyyəni sınaqdan keçirirlər.
