Kamerun Prezidenti Pol Biyanın 10 həftədən çox davam edən xarici səfərdən sonra ölkəsinə qayıtması onun səhhəti və ölkədə mümkün siyasi boşluqla bağlı müzakirələri yenidən gündəmə gətirib.
93 yaşlı prezident cümə axşamı Cenevrədən uçaraq paytaxt Yaunedəki beynəlxalq hava limanına enib. “Associated Press”in məlumatına görə, Biya xaricdə 10 həftədən artıq qalıb.
Biya dünyanın hazırda fəaliyyətdə olan ən yaşlı prezidenti hesab olunur. O, 1982-ci ildən Kameruna rəhbərlik edir.
Prezident sonuncu dəfə iyunun 7-də ölkəni tərk etmişdi. Həmin vaxt administrasiyası səfərin Avropada “qısamüddətli şəxsi qalma” olduğunu bildirmişdi. Lakin səfərin iki aydan çox davam etməsi onun prezidentliyi dövründə ölkədən ən uzunmüddətli ayrılığa çevrilib.
Biya noyabr ayında keçirilən seçkilərdə qalib gəldikdən sonra səkkizinci prezidentlik müddətinə başlayıb. Seçkinin nəticələri müxalifət tərəfindən ciddi şəkildə mübahisələndirilib.
Prezidentin uzun müddət ölkədən kənarda qalması Kamerunda hakimiyyətin gələcəyi və 93 yaşlı dövlət başçısının səhhəti ilə bağlı sualları artırmışdı. Onun ölkəyə qayıtması ilə bu müzakirələrin səngiyib-səngiməyəcəyi isə qarşıdakı dövrdə məlum olacaq.
