ABŞ-ın Kentukki ştatında yerləşən Mammoth Cave (Mamont Mağarası) dünyanın ən uzun mağara sistemi hesab olunur. Maraqlıdır ki, alimlər burada hələ də yeni tunellər və keçidlər aşkar edirlər.
Azpost.info bildirir ki, hazırda mağara sisteminin xəritələşdirilmiş uzunluğu 690 kilometrdən çoxdur. Bu məsafə Bakıdan Tbilisiyə olan məsafədən daha uzundur.
Mammoth Cave minlərlə il əvvəl əhəngdaşı qatlarının yeraltı sular tərəfindən aşınması nəticəsində formalaşıb. ABŞ Milli Park Xidmətinin məlumatına görə, mağarada yüzlərlə salon, yeraltı çay və göl mövcuddur.
Tədqiqatçılar hesab edirlər ki, sistemin hələ aşkar edilməmiş hissələri də var. Son 10 ildə mağaranın uzunluğuna onlarla kilometr yeni keçid əlavə olunub.
Mağara təkcə geoloji baxımdan deyil, həm də bioloji müxtəlifliyi ilə diqqət çəkir. Burada gün işığı görməyən və yalnız yeraltı mühitdə yaşayan nadir canlı növləri aşkarlanıb. Onların bir hissəsinin gözləri belə inkişaf etməyib.
UNESCO tərəfindən Dünya İrsi Siyahısına daxil edilən mağara hər il yüz minlərlə turist qəbul edir. Buraya gələn ziyarətçilər yeraltı çaylarda qayıqla gəzə, qədim qaya formalarını müşahidə edə bilirlər.
Geoloqların fikrincə, mağaranın tam ölçüsünü müəyyən etmək üçün hələ uzun illər araşdırmalara ehtiyac olacaq. Bu səbəbdən Mammoth Cave Yer kürəsinin ən sirli təbii obyektlərindən biri hesab edilir.
Aydın
