“Gömrük Komitəsinin ayrıca qurum kimi qalmasının heç bir mənası yoxdur”.
Azpost.info bildirir ki, bu sözləri iqtisadçı-ekspert Natiq Cəfərli bildirib.
Onun sözlərinə görə, dünyada çox nadir ölkələr var ki, orada Gömrük Komitəsi müstəqil qurumdur. Onlardan biri də Rusiyadır: “Bizim Gömrük orqanlarının mahiyyəti, strukuru, hərbi rütbələri, fəlsəfəsi Rusiyadan köçürülüb. Bundan imtina etmək zamanıdır, özünü doğrultmadı. Çünki Şimal qonşumuz öz dövlət orqanlarını tarixən biznesi əzmək üzərinə inşa edib”.
N.Cəfərli deyib ki, gömrük orqanlarının ayrıca istintaq qurumunun olması da absurddur: “Ona görə də, Gömrük Komitəsi ya İqtisadiyyat, ya da Maliyyə Nazirliyinin nəzdində kiçik bir departament kimi fəaliyyət göstərməli, əsas işi daxili istehsalçını qorumaq üçün konsepsiya hazırlamaqdan, statistik göstəriciləri toplayıb təhlil etməkdən ibarət olmalıdır”.
Ekspert bildirib ki, Komitənin fəlsəfəsi dəyişməlidir: “Bu orqanlarda çalışanlar anlamalıdırlar ki, onların fəaliyyətinin əsas istiqaməti ölkəyə kiminsə tuman-köynək gətirməsinə mane olmaq deyil də, ölkədə tuman-köynək istehsalına dəstək verməkdir. Nə qədər ki, yerli istehsal yoxdur, Gömrük orqanları gözəgörünməz, ürəkbulandırmaz olmalıdırlar. İstehsal sahələri yaranandan sonra daxili istehsalçını qorumaq üçün ağıllı tarif, rüsum siyasəti olmalıdır”.
Azpost.info
