“Elçibəyin Kələkiyə getməsi mənim üçün gözlənilməz oldu” –

Sürət Hüseynov “istefasını tələb etmirdim” dedi
06 İyun 2021 - 16:13

“Prezident Elçibəyin Kələkiyə getməsi mənim üçün gözlənilməz oldu. Elçibəyin istefasını da tələb etməmişəm”.

Azpost.info bildirir ki, bu sözləri Azərbaycanın sabiq Baş naziri, 4 iyun Gəncə qiyamının rəhbəri Sürət Hüseynov BBC radiosuna müsahibəsində deyib.

Gəncə hadisələri barədə danışan S.Hüseynov həmin vaxt baş verən siyasi proseslərə toxunub və bir sıra ittihamlarla çıxış edib.

Bununla yanaşı o prezident Elçibəyin istefasını tələb etmədiyini açıqlayıb: “Belə bir məsələ də qoymamışdım. Odur ki, prezidentin Kələkiyə getməsi mənim üçün gözlənilməz oldu. Nə üçün getdi? Bilmirəm. Ola bilsin danışıb razılaşıblar. Mənim Elçibəyə qarşı heç bir fikirm olmayıb və onun vəzifədən getməsini tələb etməmişəm”.

S.Hüseynov Gəncədə baş verən hadisələrdə Milli Məclisin sabiq sədri İsa Qəmbəri və Baş nazir Pənah Hüseyni ittiham edib:  “4 iyun hadisələrinin planını quranlar İsa Qəmbər və Pənah Hüseyn olub. Mən hakimiyyətə müqavimət göstərməmişəm. Evdə, yasda olmuşam. Dəfələrlə müraciət etmişəm ki, gəlib hərbi hissəni təhvil alsınlar. Amma bunu etmədilər. Hərbi hissəni buraxmaq üçün 12 gün əvvəl əmr verilir. Bu vaxt ərzində o özü-özünü buraxmırsa o zaman qanun ona güc tətbiq etməyə imkan verir. Hərbi hissəyə hucum etdikdən sonra, 3 nəfər həlak olduqdan sonra bir pokovnikə əmri verib göndərirlər ki, get ver Sürətə… Mən Bakıya Elçibəyi yıxmaq üçün getməmişdim. Onlar güc göstərmək üçün Gəncəyə gəliblər”.

S.Hüseynov iyun hadisələrinə görə özünü günahkar bilmədiyini deyib və buna görə üzr istəmək niyyətində olmadığını vurğulayıb: “Mən niyə üzr istəməliyəm? Bu işlərdə heç bir günahım yoxdur. Etmədiyim işə görə niyə üzr istəməliyəm?”

S. Hüseynov haqqında “Rusiyanın adamı” olması barədə deyilənləri rədd edib. Buna baxmayaraq Baş nazir olduğu dönəmdə Qarabağ münaqişəsində Moskvanın neytrallığına nal olmaq üçün bəzi məsələlərin nəzər əalınmasının tərəfdarı olub. Bu sırada Azərbaycanın MDB-yə daxil olmasını dəstəkləyib.

Sabiq Baş nazir siyasətlə məşğul olmaq niyyətində olmadığını bildirib.

Xatırladaq ki, Sürət Hüseynovun 1993-cü il, 4 iyunda Gəncədə qaldırdığı qiyam nəticəsində ölkədə siyasi böhran yaranıb və nəticədə AXC hakimiyyəti devrilib.

Azpost.info