Bu gün mağazalarda çoxlu sayda pendir və pendir məhsulu satılır. Lakin bunların eyni məhsul olmadığını bilmək vacibdir. Sağlamlıq üçün faydalı və keyfiyyətli məhsul seçmək istəyənlər məhz təbii pendirə üstünlük verməlidirlər.
Təbii pendir inək, qoyun və ya keçi südündən hazırlanır. Pendir növləri yalnız istifadə olunan südün növünə görə deyil, hazırlanma üsuluna, həmçinin istifadə edilən fermentlərə, bakteriyalara və kifə görə də fərqlənir.
Pendirin dadı və teksturası istifadə olunan südün xüsusiyyətlərindən və yetişmə müddətindən asılıdır. Təbii pendirin əsas inqrediyentləri süd, duz və bakteriyalardır.
Təbii pendiri necə tanımaq olar?
Bir çox təbii pendir növü nisbətən baha olur. Bunun səbəblərindən biri 1 kiloqram pendir hazırlamaq üçün təxminən 10 litr süd tələb olunmasıdır. Buna görə supermarketlərdə daha ucuz pendir məhsullarına da rast gəlinir.
Əsl pendiri pendir məhsulundan ayırmaq üçün bir neçə məqama diqqət yetirmək lazımdır:
Qiymət: Təbii pendir, bir qayda olaraq, daha bahalı olur.
Qablaşdırma: Etiketdə yazılan məlumatları diqqətlə oxumaq lazımdır. Məhsulun üzərində “kəsmik məhsulu” və ya pendir məhsulu olduğu göstərilirsə, bu, klassik mənada təbii pendir deyil.
Tərkib: Təbii pendirin tərkibi adətən sadə və qısa olur. Pendir məhsullarında isə emulqatorlar, konservantlar, bitki yağları, şəkər və digər əlavələr ola bilər.
Süd yağının əvəzediciləri: Tərkibdə süd yağının əvəzedicilərinin olması məhsulun pendir analoqu və ya digər süd məhsulu olduğunu göstərən əsas əlamətlərdən biridir.
Bəzi pendir məhsullarının tərkibində südün miqdarı az, nişasta, kokos və palma yağları, həmçinin süd yağının əvəzediciləri isə daha çox ola bilər.
Məhsulun qoxusuna da diqqət yetirmək mümkündür. Təbii pendirdə süd və pendirə xas qoxu olur. Pendir məhsullarında isə bəzən kəskin, turş və ya qeyri-təbii qoxu hiss edilə bilər.
