Futbol
Futbol üzrə Misli Premyer Liqasında XIX turun növbəti oyunları keçirilib. AzPost AZƏRTAC- a istinadla xəbər verir ki, günün ilk qarşılaşmasında “Zirə” Zirə İdman Kompleksinin stadionunda “Araz-Naxçıvan”ı qəbul edib. Matç meydan sahiblərinin 1:0 hesablı qələbəsi ilə yekunlaşıb.
Görüşün yeganə qoluna 4-cü dəqiqədə İsmayıl İbrahimli imza atıb.
Bu nəticədən sonra turnir cədvəlində xallarının sayını 33-ə çatdıran “Zirə” üçüncü pilləyə qalxıb, Naxçıvan təmsilçisi isə 39 xalla ikinci sırada qalıb.
Günün digər futbol oyununda Mehdi Hüseynzadə adına Sumqayıt şəhər stadionunda “Sumqayıt” və “Səbail” komandaları üz-üzə gələcəklər. İnqilab Məmmədovun idarə edəcəyi matç saat 18:30-da başlayacaq.
Aktivində 20 xalı olan “kimyaçılar” altıncı, 9 xala malik “Səbail” isə sonuncu – onuncu sırada yer alıb.
Qeyd edək ki, turun ötən gün keçirilmiş açılış futbol matçında “Qarabağ” “Şamaxı”ya 3:2 hesabı ilə qalib gəlib.
