Gədəbəy rayon İcra Hakimiyyətinin başçısı Orxan Mürsəlov dünən polislərlə vətəndaşlar arasında insidentin baş verdiyi Söyüdlü kəndinə gedib. Sakinlərlə görüşən başçı sualları cavablandırıb.
Azpost.info-nun məlumatına görə, icra başçısı bildirib ki, rayon sakinlərinin sağlamlığı prioritet məsələlərdəndir.
Söyüdlü kəndi ərazisində yaradılan süni göllə bağlı narazılığı toxunan icra başçısı deyib ki, heç bir qeyri-qanuni fəaliyyətdən söhbət gedə bilməz. O. Mürsəlov bildirib ki, adıçəkilən göl 11 ildir fəaliyyət göstərir: “İndiyə qədər göllə bağlı bizə heç bir şikayət daxil olmayıb”.
İcra başçısı gölün ekoloji cəhətdən zərərli olması barədə səsləndirilən iddiaları “dedi-qodu” adlandırıb: “Göl nəzarətdə saxlanılır, texnikalar vasitəsilə gölün yerləşdiyi torpaq təzələnir, lazımi işlər görülür. Lazım olarsa sakinlərin və Ekologiya və Təbii Sərvətlər Nazirliyinin mütəxəssislərinin iştirakı ilə narazılığa səbəb olan gölə baxış keçirə bilərik”.
Başçı ikinci gölün qazılması ilə bağlı yayılan məlumatı təkzib edib. O əhalini təmkinli olmağa və məsələləri birgə müzakirə etməyə çağırıb.
Qeyd edək ki, dünən Gədəbəy rayonunun Söyüdlü kəndi ərazisində fəaliyyət göstərən süni gölün ətrafa zəhərli maddə buraxdığını iddia edərək etiraz ediblər. Bu zaman isə polislərlə sakinlər arasında insident yaşanıb.
